PUDUT 18 - BALA LUK DO'

Pejani' Allah Ratnan Kareb Isak Ruen Nenganak

¹ Idi teh Tuhan nesilagan ni Ibrahim muneng ku lawa kayuh luk meraben déi' Mamré, kareb ieh tudo munung tanga' leponeh kareb mét idang.

² Ieh netukag idi nekali' teluh burur lemulun tuped pa kiungneh. Kareb ieh nenier nediteluh, ieh nupun ratnan tanga' ineh iné' papu' nediteluh, idi ieh netekunal.

³ Kebalaneh, “O tuan-tuanku, kudeng meteluh méi' negku, aleg ngelaba negku, ui ini demulun meteluh.

⁴ Nima' negku ngalap abpa' idi maru' kukud meteluh, idi do' meteluh tudo ngato erur meteluh liang kayuh ini.

⁵ Ui miak ngalap sesuut ruti, pad ngetueh burur meteluh. Pangeh ineh miak meteluh nalan teh. Ngaceku meteluh pangeh nengikak demulun meteluh.” Idi kebala diteluh, “Do'! Kai maya' balamu.”

⁶ Idi Ibrahim saget-saget nesemuet bang lepo, idi kebalaneh ni Sara, “Miket ngalap banak luk meluun do'. Ngerabur neneh, idi nganau' ku ruti.”

⁷ Idi Ibrahim nupun matun sapi'-sapi'neh, idi ieh nengalap sebuleng anak sapi' luk do' lamu, idi nemaré neneh inan demulunneh. Idi demulun ineh petacu nenanek neneh.

⁸ Idi ieh nengalap lemak rata idi rata sapi' ineh idi uang teh, idi ieh nengerareng ineh pa kiungdeh. Idi ieh netuped iring diteluh liang kayuh ineh laba' diteluh kuman.

⁹ Kebala diteluh neneh, “Iapehké Sara, awanmu ineh?” Idi kebala Ibrahim, “Déi' ieh bang lepo.”

¹⁰ Idi kebala sebururdeh, “Idi na miak na Ui lemubed matun namu pangeh iwa' bulan. Idi Sara, awanmu ineh miak nenganak aceh anak deléi.” Idi Sara neninger rat pa ketedNeh, munung tanga' lepo ineh.

¹¹ Ibrahim idi Sara pangeh mengered, idi pangeh nepelaba ulun didueh. Idi Sara pana' pangeh nugka' ratnan dalan decur.

¹² Idi Sara meriruh, keterawéneh, “Ui pangeh mengered idi awanku pana' mengered, miakké ui ngalap awang luk kudeng ineh?”

¹³ Idi kebala Tuhan ni Ibrahim, “Ngudehké Sara meriruh idi pebala, ‘Miakké ui nenganak aceh anak, ngaceku nekini ui pangeh mengered?’

¹⁴ Inanké luk pelaba ikat kuan Tuhan? Idi bang kareb luk petulu, pangeh iwa' bulan Ui miak lemubed matun namu, idi Sara miak nenganak aceh anak deléi'.”

¹⁵ Iamo' Sara nengalum, kebalaneh, “Na ui meriruh”; ngaceku ieh matot. Iamo' kebala Tuhan, “Matu, iko pangeh meriruh.”

Ibrahim Sembayang Mutuh Kuan Bawang Sodom

¹⁶ Idi teluh burur lemulun ineh nenalan matun bawang Sodom. Idi Ibrahim iné' nated nediteluh maya' dalandeh.

¹⁷ Idi kebala Tuhan, “Na Ui ngapung anun-anun luk ruenKu ineh pa kiung Ibrahim?

¹⁸ Ngaceku Ibrahim miak mangun ku aceh pupu luk rayeh idi melalud, idi amung-amung pupu luk bang tana' miak ngalap peruan rat neneh?

¹⁹ Ui pangeh nemili' neneh, pad ieh miak ngecuk anak-anakneh idi inulneh luk muci rat neneh ineh maya' ukumKu idi nganau' luk matu idi luk mesiri, pad Ui miak ngacing kuanneh anun-anun luk pangeh pijani'Ku neneh.”

²⁰ Idi kebala Tuhan ni Ibrahim, “Ngaceku adu' rat bawang Sodom idi Gemora pelaba rayeh idi sala'deh pelaba dat,

²¹ idi nekini Ui sikal temurun nier kudeng kekamendeh petulu dengan adu' luk pindengerKu ineh.”

²² Idi dueh burur ineh nenalan matun Sodom. Iamo' Tuhan ketecan dengan Ibrahim.

²³ Idi Ibrahim iné' muneng Neneh idi nepebala, “Miakké Tuhan ngaté lemulun luk matu puar-puar dengan lemulun luk dat?

²⁴ Kudeng inan limeh ngepulu' burur luk matu bang bawang ineh, miakké Iko ngusag bawang ineh dengan na méi' nedeh luk limeh ngepulu' burur luk matu ineh?

²⁵ Kali' rungen Iko na miak ngaté lemulun luk matu pad-pad dengan lemulun luk dat, idi ngukum lemulun luk na mesala' pad-pad dengan lemulun luk mesala'. Ngaceku Lun luk Mutut Besara' bang aput-aput tana' ini na miak na nganau' luk matu.”

²⁶ Idi kebala Tuhan, “Kudeng inan limeh ngepulu' burur lun bang bawang Sodom, luk matu kali'Ku, idi ngaceku lemulun ineh kali' rungen Ui ngulun bawangdeh ineh.”

²⁷ Idi kebala Ibrahim, “Matu, ui ini lemulun mo'. Ui mutuh do' ngaceku ui mekuu' pebala inan Tuhan.

²⁸ Kudeng arang luk limeh ngepulu' burur luk matu ineh inan limeh luk na matu, miakké Tuhan ngusag bawang ineh ngaceku limeh burur luk na matu ineh?” Idi kebala Tuhan, “Ui na miak ngusag bawangdeh kudeng Ui nier apat ngepulu' limeh burur luk matu su ineh.”

²⁹ Idi teh kebala Ibrahim, “Kian inan apat ngepulu' burur mo' luk matu lek.” Idi kebala Tuhan, “Ngaceku apat ngepulu' burur lemulun luk matu na Ui miak ngusag bawang ineh.”

³⁰ Idi kebala Ibrahim, “Do' Tuhan na museh ku balaku, ngaceku ui sikal pebala teh. Kian inan teluh ngepulu' burur mo' luk matu bang bawang ineh.” Idi kebala Tuhan, “Na Ui miak ngusag bawang ineh kudeng Ui nier teluh ngepulu' burur luk matu.”

³¹ Kebala Ibrahim, “Ui mutuh do' ngaceku ui mekuu' pebala inan Tuhan. Kian, inan dueh ngepulu' burur lemulun luk matu lek.” Kebala Tuhan, “Ratnan dueh ngepulu' burur lemulun luk matu, na Ui miak ngusag bawang ineh.”

³² Idi kebala Ibrahim teh, “O Tuhan, aleg museh, idi ui sikal pebala teh sekua' ini mo'. Kian, inan pulu' burur lemulun luk matu lek.” Idi kebala Tuhan, “Ngaceku pulu' burur lemulun luk matu na Ui miak ngusag bawang ineh.”

³³ Kareb Ieh pangeh nepebala kuan Ibrahim, idi Tuhan neburo. Idi Ibrahim pana' nuli'.