PUDUT 17 - BALA LUK DO'

Sunat Ku Etu Pejani'

¹ Kareb ulun Abram iwa' ngepulu' iwa' lak idi Tuhan nesilagan neneh, idi kebalaNeh, “Ui ini Allah luk Melalud. Idi do' iko maya' balaKu, idi nganau' luk matu.

² Ui maré aceh pejani' arangKu denganmu, idi Ui sikal ngula' namu.”

³ Idi Abram netekunal. Idi kebala Allah neneh,

⁴ “Ini jani'Ku namu: Ui pejani' ratnan iko mangun ku taman tuda'-tuda' pupu.

⁵ Idi na iko tetanen Abram peh, iamo' iko miak tetanen Ibrahim, ngaceku iko pangeh inau'Ku mangun ku taman tuda'-tuda' pupu.

⁶ Idi Ui miak maré namu mula' inul, idi sebuangdeh mangun ku raca'. Idi inulmu pelaba ula', pad ideh mangun ku mula' pupu.

⁷ “Idi Ui maya' jani'Ku namu idi nan inulmu muci rat namu, ieh ineh sebuleng pejani' luk meruked. Idi Ui mangun ku Allahmu idi Allah amung-amung inulmu luk muci rat namu.

⁸ Idi kuanmu dengan inulmu Ui sikal maré tana' luk inanmu tudo nekini mepad kudeng sakai, ieh ineh amung tana' Kanaan mangun ku babpatmu macing ruked-ruked. Idi Ui mangun ku Allah kuandeh.”

⁹ Idi teh kebala Allah ni Ibrahim, “Do' iko idi inulmu luk muci rat namu maya' jani'Ku.

¹⁰ Iko dengan inulmu luk muci rat namu, na miak na maya' jani'Ku ratnan amung-amung deléi arang muyuh ruen nunat.

^11-12 Rat pad sini do' muyuh nunat amung-amung anak deléi kareb ulundeh ualuh aco, dengan anak demulun luk tinganak bang ruma'mu, idi luk pangeh bilih rat nelun sakai, pad mangun ku tanu' pejani' luk arangKu dengan muyuh.

¹³ Anid-anid burur deléi na miak na uen nunat teh, pad pejani'Ku miak mangun ku aceh pejani' luk meruked bang burur muyuh ineh.

¹⁴ Idi amung-amung deléi luk na sinunat miak uen matad rat arang pupudeh, ngaceku ideh pangeh nengelaba pejani'Ku.”

¹⁵ Idi kebala Allah ni Ibrahim, “Aleg iko neten ngadan awanmu Sarai peh, iamo' rat pad sini ngadanneh Sara.

¹⁶ Ui miak ngeperuan neneh, idi rat neneh teh Ui maré seburur anak deléi kuanmu. Idi teh Ui ngeperuan neneh pad ieh mangun ku tinan tuda'-tuda' pupu. Idi rat arang inulneh miak mangun tuda'-tuda' raca'.”

¹⁷ Idi Ibrahim netekunal idi meriruh, keterawéneh, “Miakké seburur lemulun luk ulun meratu lak inan anak? Miakké Sara luk ulun iwa' ngepulu' lak inan anak?”

¹⁸ Idi kebalaneh nan Allah, “O Tuhan, nima' Ismail ruenMu ngasa'!”

¹⁹ Iamo' kebala Allah, “Na! Awanmu Sara ineh miak nenganak sebuleng anak deléi kuanmu. Idi do' iko neten ngadanneh Isak. Idi Ui miak maya' pejani'Ku arangKu denganneh, idi dengan inulneh, ngaceku ieh ineh aceh pejani' luk meruked.

²⁰ Idi Ui pangeh neninger putuhmu ratnan Ismail, pad Ui miak ngeperuan neneh, idi maré neneh mula' anak idi mula' inul. Idi ieh miak mangun ku taman pulu' dueh raca'. Idi Ui miak nganau' inulneh mangun ku sebuleng pupu luk rayeh.

²¹ Iamo' Ui miak maya' pejani'Ku kuan Isak, luk miak ruen Sara nenganak kuanmu bang kareb luk kudeng ini lak baruh.”

²² Kareb Allah pangeh nepebala ni Ibrahim, idi Ieh nepatad rat neneh.

²³ Bang aco sineh teh Ibrahim nemaya' bala Allah, idi ieh nenunat anakneh Ismail, idi amung-amung deléi luk tinganak bang ruma'neh, idi luk bilihneh pana', ieh ineh amung-amung deléi luk bang ruma'neh.

²⁴ Idi ulun Ibrahim iwa' ngepulu' iwa' lak kareb ieh sinunat.

²⁵ Idi ulun Ismail, anakneh ineh, pulu' teluh lak.

²⁶ Bang aco sineh Ibrahim dengan Ismail pangeh sinunat,

²⁷ dengan amung-amung demulun Ibrahim.