PUDUT 14 - BALA LUK DO'

Abram Muit Ni Lut

¹ Apat burur raca', ieh ineh Amrapel raca' Sinar, Ariok, raca' Elasar, Kedorlaumer, raca' Elam, idi Tidal, raca' Goyim,

² iné' pebunu' dengan limeh raca', ieh ineh Bira, raca' Sodom, Birsa, raca' Gemora, Sinab, raca' Adma, Semebar, raca' Seboyim, idi raca' Béla, ieh ineh bawang Soar.

³ Idi limeh raca' ineh neperurum idi nepamung luun raked déi' Sidim, ieh ineh Abpa' luk Mepaci'.

⁴ Pulu' dueh lak raca'-raca' ineh pangeh inimet Raca' Kedorlaumer. Iamo' bang lak luk kepulu' teluh ideh sikal metueh rat neneh.

⁵ Idi bang lak luk kepulu' apat Kedorlaumer idi amung-amung raca' luk denganneh nacing dengan bawehdeh, idi nengelaya' lun Repaim déi' bawang Asterot Karnaim, lun Susim déi' bawang Ham, lun Imim déi' Saweh Kiritaim,

⁶ idi lun Hori déi' luun pegkung-pegkung Edom. Idi ideh nengerada' nedeh macing déi' Elparan, luk iring su luk ali-ali.

⁷ Pangeh ineh ideh nelemubed iné' déi' En Mispat, ieh ineh Kadis, idi ideh nengelaya' amung-amung bawang lun Amalek idi teh lun Amori luk tudo déi' Hasesen Tamar.

⁸ Idi raca' Sodom, raca' Gemora, raca' Adma, raca' Seboyim, idi raca' Béla, ieh ineh Soar, netemina' pebunu' déi' luun Raked Sidim;

⁹ sikal metueh ratnan raca' Elam, raca' Goyim, raca' Sinar, idi raca' Elasar. Apat burur raca' sikal metueh ratnan limeh raca' ineh.

¹⁰ Idi Raked Sidim ineh panu' ku lubang tir Idi kareb raca' Sodom idi raca' Gemora neburo, idi ideh nekab bang lubang ineh. Idi teluh raca' luk ketecan ineh neburo iné' déi' luun pegkung.

¹¹ Idi apat raca' ineh nengalap amung-amung binaweh luk bang bawang Sodom idi Gemora, dengan amung-amung akandeh, idi nuli'.

¹² Idi ideh nenaban ni Lut, ieh ineh anak pinaken Abram dengan amung-amung binawehneh, ngaceku ieh pana' tudo déi' bawang Sodom ineh. Idi ideh nuli'.

¹³ Idi seburur lun luk nepuit nupun nemada' bala ineh ni Abram, lun Iberani ineh, luk tudo muneng ku lawa kayuh Mamré luk meraben. Mamré ineh seburur lun Amori, luk kinanak Eskol idi Aner, ieh ineh lun luk megéi' ngedengan ni Abram.

¹⁴ Kareb Abram neninger bala ratnan anak pinakenneh pangeh tiban, idi ieh nengamung amung anak itinneh luk miak pebunu'. Amungdeh 318 burur. Idi ideh nengerada' bunu' ineh macing déi' Dan.

¹⁵ Idi ieh nemabpat bawehneh dueh babpat, idi ideh nengerieng bunu' ineh kareb medacem. Idi ideh metueh rat nedeh, idi nengusu nedeh pad macing déi' Hoba, luk pa tinueh busat aco bawang Damsik.

¹⁶ Idi ieh nengalap amung-amung binaweh luk tibandeh ineh lemubed. Idi ieh nenguit anak pinakenneh Lut ineh teh lemubed dengan amung-amung binawehneh, idi dengan amung-amung decurneh idi lun baken luk pangeh tiban ineh.

Melkisadak Ngeperuan Ni Abram

¹⁷ Kareb Abram nelemubed pangeh ieh nengelaya' Raca' Kedorlaumer idi raca'-raca' luk baken, idi raca' Sodom ineh neremuat ngapu' neneh déi' Raked Saweh, ieh ineh Raked Raca'.

¹⁸ Idi Melkisadak raca' Salem nenguit ruti idi abpa' anggur kuan Abram, ngaceku ieh ineh imam Allah luk Meluun Dita'.

¹⁹ Idi ieh nengeperuan ni Abram, kebalaneh, “Allah luk Meluun Dita', ieh ineh Allah luk nemudut langit idi tana' ngeperuan ni Abram.

²⁰ Idi amung-amung ubur kuan Allah luk Meluun Dita', luk nemaré namu metueh ratnan bunu'mu!” Idi Abram nemaré kuanneh babpat pulu' ratnan amung-amung luk ilapneh ineh.

²¹ Idi kebala raca' Sodom ni Abram, “Maré kuanku amung-amung lun ineh, iamo' amung-amung binaweh lapenmu.”

²² Iamo' kebala Abram, “Ui pebulung ku ngadan Tuhan Allah luk Meluun Dita', luk nemudut langit idi tana',

²³ idi na tupu ui sikal ngalap anun-anun luk iko kuan, kudeng sepekatu gitian idi sebuleng abet kasut pana', pad iko na pebala, ‘Ui pangeh nengula' binaweh Abram.’

²⁴ Ui na miak ngalap anun-anun luk kuanku. Iamo' ui miak ngalap luk pangeh kinan anak itinku, idi babpat lemulun luk nengedengan negku, ieh ineh Aner, Askol, idi Mamré.”