PUDUT 13 - BALA LUK DO'

Abram Idi Lut Patad

¹ Idi Abram neremuat rat bang bawang Masir, dengan awanneh idi amung-amung luk ieh kuan, matun Tana' Negeb. Idi Lut pana' nemaya' neneh.

² Idi Abram ineh lun do' dengan mula' aya', pirak, idi amas teh.

³ Idi ieh nenalan maya' dalan luk nedalanneh atun rat Tana' Negeb macing déi' Baitel, ieh ineh su luk inanneh nelupo pun-pun, arang Baitel dengan Ai;

⁴ macing su bubpun luk pinudutneh ineh. Idi Abram nesembayang inan Tuhan.

⁵ Idi Lut luk nemaya' ni Abram ineh, inan dumba, amék, idi sapi', idi lepo kibung teh.

⁶ Idi na tana' ineh miak inan didueh tebawang, ngaceku aya' didueh pelaba ula'.

⁷ Idi teh inan aceh kedaluh arang lun matar aya' Abram dengan lun matar aya' Lut. Idi bang kareb ineh lun Kanaani idi lun Prisi mo' tebawang nan tana' ineh.

⁸ Idi kebala Abram ni Lut, “Kiteh ini dingetameh. Na do' demulun kiteh pekedaluh.

⁹ Do' kiteh patad. Do' mili' tana' luk pianmu. Iko amé i léi, idi ui améi'i léi.”

¹⁰ Idi Lut nenier aput raket Abpa' Yarden macing déi' Soar, idi inan petap abpa', mepad kudeng Kabun Eden idi tana' Masir. Ieh ineh atun ratnan Tuhan nengukum bawang Sodom idi Gemora.

¹¹ Idi Lut nemili' raked Abpa' Yarden kuanneh. Idi ieh nenalan iné' pa busat aco. Idi didueh nepatad.

¹² Idi Abram tebawang déi' Kanaan. Iamo' Lut tudo bang bawang-bawang rayeh luk luun raked abpa' ineh. Idi ieh nelupo muneng ku bawang Sodom.

¹³ Idi lemulun bang bawang Sodom ineh pelaba dat idi pelaba sala' pa kiung Allah.

Abram Mepura' Amé' Déi' Hebron

¹⁴ Pangeh Lut nepatad rat ni Abram, kebala Tuhan ni Abram, “Do' iko nier libut-libut rat su luk inanmu tuped ineh.

¹⁵ Ngaceku amung-amung tana' luk sirenmu ineh, Ui maré namu, idi nan inulmu macing ruked-ruked.

¹⁶ Idi Ui miak ngula' inulmu ineh mepad kudeng kinula' abuh tana'. Kudeng miak ngiap abuh tana' ineh, idi teh miak ngiap inulmu ineh.

¹⁷ Do' iko amé' aput-aput tana' ineh, ngaceku amung ineh barénKu namu.”

¹⁸ Idi Abram nemubuh leponeh idi nelupo muneng ku lawa kayuh Mamré luk meraben luk bang bawang Hebron. Idi ieh nemudut aceh bubpun kuan Tuhan déi'.