PUDUT 12 - BALA LUK DO'

Allah Nawar Ni Abram

¹ Idi kebala Tuhan ni Abram, “Remuat iko ratnan bawangmu, pupumu, idi ruma' tamanmu, amé' bawang luk badénKu namu.

² Idi Ui sikal nganau' namu mangun ku aceh pupu luk mula', idi Ui ngeperuan namu idi nganau' ngadanmu mebala, pad ineh mangun ku peruan kuan lun baken.

³ “Ui ngeperuan idé-idé luk ngeperuan namu. Iamo' Ui ngediman lemulun luk ngediman namu. Idi rat namu amung-amung pupu luk bang tana' ini miak ngalap peruan.”

⁴ Kareb ulun Abram 75 lak idi ieh nenalan rat Haran, maya' kudeng luk bila Tuhan neneh. Idi Lut pana' nemaya' neneh.

⁵ Idi Abram nenguit awanneh Sarai, anak pinakenneh Lut, dengan amung-amung binaweh idi demulun luk ilapdeh déi' bawang Haran. Idi ideh nenalan iné' bawang Kanaan. Kareb ideh nacing déi' bawang Kanaan,

⁶ idi Abram nelemaba bawang ineh pad ieh nacing lawa kayuh luk meraben déi' Moré, ieh ineh su luk inan sembayang déi' Sikem. Idi kareb ineh lun Kanaani tudo bang bawang ineh.

⁷ Idi Tuhan nesilagan ni Abram, kebalaNeh, “Ui maré tana' ini kuan inulmu.” Idi su ineh Abram nemudut aceh bubpun kuan Tuhan luk pangeh nesilagan neneh.

⁸ Pangeh ineh ieh nemubuh iné' luun pegkung luk pa busat aco bawang Baitel. Idi ieh nelupo arang Baitel luk pa acep aco dengan Ai luk pa busat aco. Idi su ineh teh ieh nemudut aceh bubpun, idi ieh nesembayang inan Tuhan.

⁹ Idi Abram nenalan matun Tana' Negeb.

Abram Déi' Masir

¹⁰ Idi inan aceh iru' bang bawang ineh, idi Abram iné' déi' Masir sikal tudo déi', ngaceku iru' pelaba io bang bawang ineh.

¹¹ Idi kareb ieh lélé macing déi' Masir, idi kebalaneh nan awanneh ineh, “Ui kali' namu seburur decur luk metaga.

¹² Kareb lun Masir nier namu, ideh miak pebala, ‘Ini awanneh.’ Idi ideh sikal ngaté negku, pad ideh miak ngalap namu.

¹³ Do' iko mala namu kinanakku, pad ui na mesusa' ruendeh, idi ui miak uen ngulun ngaceku iko.”

¹⁴ Kareb Abram nacing bang bawang Masir, idi lun Masir nenier decur ineh selemulun luk do' taga.

¹⁵ Idi pengulu-pengulu raca' Masir nenier neneh, idi nengubur neneh pa kiungneh. Idi decur ineh inuitdeh semuet bang ruma' raca'.

¹⁶ Idi ieh nengasa' Abram do'-do' ngaceku decur ineh; idi ieh nemaré kuan Abram amék, sapi', keladai, demulun, idi unta.

¹⁷ Idi Tuhan nengacing ét luk mebura' kuan raca' idi uang tetek ruma'neh, ngaceku Sarai awan Abram ineh.

¹⁸ Idi raca' nenawar ni Abram, idi kebalaneh, “Kudeng apeh luk inau'mu negku? Ngudeh iko na maré kali' negku ratnan decur ineh awanmu?

¹⁹ Ngudeh iko neten neneh kinanakmu, pad ui lélé ngalap neneh ku awanku? Siruh, ini awanmu, do' ngalap neneh idi buro!”

²⁰ Idi raca' Masir nemaré bala kuan lun dukenneh, pad ideh nenated ni Abram remuat rat bang bawang ineh dengan awanneh, idi dengan amung-amung luk ieh kuan.