PUDUT 11 - BALA LUK DO'

Pudut Luk Medita' Dei' Babil

¹ Idi pun-pun lemulun bang aput tana' inan sebuleng buri' mo' idi baladeh mepad mo'.

² Idi bang aceh kareb ideh nenalan amé' pa busat aco, idi ideh nenier patar luk rayeh déi' tana' Sinar, idi ideh netudo déi'.

³ Idi kebaladeh seburur dengan seburur, “Do' tau nganau' tana' mangun ku batu bata idi ngeseb ineh do'-do'.” Idi batu bata ineh mangun ku libal batu idi amut mangun ku libal tana' salit.

⁴ Idi teh kebaladeh, “Do' tau mudut aceh bawang idi aceh pudut luk medita', idi budukneh macing déi' langit, idi ratnan ineh tau miak mebala, pad tau na mepatad bang aput tana' ini.”

⁵ Idi Tuhan netemurun sikal nier bawang idi pudut luk medita' luk inau' lemulun ineh.

⁶ Idi kebalaNeh, “Siruh, amung-amung lemulun ini mepad, idi amung-amungdeh mepad buri' teh! Idi ini luk pun-pun inau'deh; idi nekini na luk mebpeng nedeh na nganau' anun-anun luk piandeh.

⁷ Do' Tau temurun idi ngeraruh buri'deh déi', pad seburur pana' na kali' bala lun denganneh.”

⁸ Idi Tuhan nematad nedeh rat déi' amé' aput-aput bang tana'. Idi ideh nugka' ratnan kekkamen mudut bawang ineh.

⁹ Idi ngaceku ineh, ngadan bawang ineh titen Babil, ngaceku déi' Tuhan nengeraruh bala amung-amung lemulun bang tana'. Idi rat déi' Tuhan nematad nedeh bang aput-aput tana'.

Inul Sem

¹⁰ Idi ini inul Sem. Kareb ulun Sem 100 lak, idi ieh nenginul Arpaksad, ieh ineh dueh lak pangeh ereb ineh.

¹¹ Muci ratnan ineh, Sem mulun 500 lak, idi nenginul tuda'-tuda' anak teh.

¹² Kareb ulun Arpaksad 35 lak, idi ieh nenginul Sila.

¹³ Muci ratnan ineh Arpaksad mulun 403 lak, idi ieh nenginul tuda'-tuda' anak teh.

¹⁴ Kareb ulun Sila 30 lak, idi ieh nenginul Iber.

¹⁵ Muci ratnan ineh Sila mulun 403 lak, idi ieh nenginul tuda'-tuda' anak teh.

¹⁶ Kareb ulun Iber 34 lak, idi ieh nenginul Peleg.

¹⁷ Muci ratnan ineh Iber mulun 430 lak, idi ieh nenginul tuda'-tuda' anak teh.

¹⁸ Kareb ulun Peleg 30 lak, idi ieh nenginul Ru.

¹⁹ Muci ratnan ineh Peleg mulun 209 lak, idi ieh nenginul tuda'-tuda' anak teh.

²⁰ Kareb ulun Ru 32 lak, idi ieh nenginul Serug.

²¹ Muci ratnan ineh Ru mulun 207 lak, idi ieh nenginul tuda'-tuda' anak teh.

²² Kareb ulun Serug 30 lak, idi ieh nenginul Nahor.

²³ Muci ratnan ineh Serug mulun 200 lak, idi ieh nenginul tuda'-tuda' anak teh.

²⁴ Kareb ulun Nahor 29 lak, idi ieh nenginul Tira.

²⁵ Muci ratnan ineh, Nahor mulun lak 119 lak, idi ieh nenginul tuda'-tuda' anak teh.

²⁶ Kareb ulun Tira 70 lak, idi ieh nenginul Abram, Nahor, idi Haran.

²⁷ Idi ini anak inul Tira. Tira nenginul Abram, Nahor, idi Haran. Idi Haran nenginul Lut.

²⁸ Haran ineh naté atun ratnan tamanneh Tira, bang bawang luk inanneh tinganak, ieh ineh Ur Kasdim.

²⁹ Idi Abram dengan Nahor pana' nengaweh. Idi ngadan awan Abram ineh Sarai. Idi ngadan awan Nahor ineh Milka, ieh ineh anak Haran luk taman Iska pana'

³⁰ Idi Sarai ineh na anak.

³¹ Idi Tira ineh nenguit anakneh Abram, idi mupunneh Lut, luk anak Haran, idi ibanneh Sarai, ieh ineh awan Abram ineh, idi ideh nepura' rat Ur Kasdim iné' bawang Kanaan. Idi ideh nacing dei' Haran, idi tudo déi'.

³² Idi ulun Tira 205 lak, idi ieh naté déi' bawang Haran ineh.