NEHEMIA 9 - BALA LUK DO'

Lun Israil Nengamo Sala'deh

¹ Idi dueh ngepulu' apat aco bulan ineh teh, lun Israil nepamung sikal mawa' na kuman ngaceku mesusa' niat ku sala'deh. Ideh nenacung idi nenganau' abuh luun uluhdeh mangun ku tanu' susa' niatdeh.

² Idi amungdeh pangeh nepatad rat nelun pupu baken. Idi teh ideh netuped ngamo sala'deh idi sala' tepundeh pana'.

³ Idi Ukum Tuhan Allahdeh bica' kuandeh teluh jam kinioneh. Idi teh teluh jam kinioneh ideh nengamo sala'deh idi nesembayang inan Allah.

⁴ Idi Yesua, Bani, Kadmil, Sebania, Buni, Serebia, Bani, idi Kenani netuped bang mimbar lun Liwi. Idi ideh nesembayang dengan rayeh bala kuan Tuhan Allahdeh.

⁵ Idi lun Liwi ini nenawar nelun mula' sembayang: Yesua, Kadmil, Bani, Hasabnia, Serebia, Hodia, Sebania, idi teh Petahia. Kebaladeh, “Do' muyuh tuped ngubur Tuhan Allah muyuh! Ngubur Neneh macing ruked-ruked. O Tuhan, do' ngadanMu luk rayeh uenngubur. Ngaceku ngadanMu luk meluun rayeh.”

Sembayang Ngamo Sala'

⁶ Idi kudeng ini sembayangdeh: “O Tuhan, Iko sebuleng luk Tuhan; Iko nenganau' langit idi gituen. Iko nenganau' tana' idi abpa' rayeh. Idi teh Iko nenganau' amung-amung luk bang ineh. Iko nemaré ulun kuan luk amung-amung. Amung lalud luk bang langit netekeradung sembayang Namu.

⁷ O Tuhan Allah, Iko nemili' Abram; Iko nenguyut neneh remuat rat bang bawang Ur luk déi' Babil, idi nengisu' ngadanneh mangun ku Ibrahim.

⁸ Iko kali' neneh lutep maya' Namu. Iko nenganau' aceh jani' kuanneh. Iko nepejani' maré kuanneh tana' Kanaan, tana' Hiti idi Amori, tana' Prisi, Yebusi, idi Girgasi mangun ku bawang inulneh. Idi Iko lutep maya' jani'Mu.

⁹ “Iko nekali' tepun kai luk medereh déi' bawang Masir; Iko neninger tawardeh mutuh pedengan rat déi' Abpa Pisui.

¹⁰ Iko nenganau' tanu' luk inan mawa pa kiung raca' Masir, idi pa kiung lun rayeh-rayehneh idi pupuneh teh, ngaceku Iko kali' nedeh ngedereh pupuMu. Iko mebala macing aco sini.

¹¹ Iko nenganau' aceh dalan maya' uned abpa' rayeh kuan pupuMu, idi nenguyut nedeh maya' tana' luk tekering. Idi lemulun luk nengerada' nedeh pinatéMu bang abpa' rayeh, mepad kudeng batu luk tirem bang abpa' luk meparu'.

¹² Iko nenguyut nedeh kareb maco maya' aceh laput, idi kareb medacem apuiMu nengacang dalandeh.

¹³ Déi' Pegkung Sinai Iko netemurun rat Surga, idi nemada' pupuMu su ineh. Iko nemaré ukum idi bada' luk do'.

¹⁴ Iko nengecuk nedeh maya' Aco luk inan Mudeng, idi nemaré ukumMu dengan bala demulunMu Musa.

¹⁵ “Kareb ideh melau, Iko nemaré ruti rat surga, idi kareb ideh meparing Iko nemaré abpa' rat bang batu. Iko luk nengecuk nedeh ngimet tana', luk pijani'Mu barén nedeh.

¹⁶ Iamo' tepun tau medita' niat idi metueh niat, pad ideh ara' maya' ukumMu.

¹⁷ Ideh ara' maya' ngaceku ideh nekelupan amung luk inau'Mu, idi na nengerawé tanu' luk biréMu. Ideh metueh niat pad ideh nemili' seburur lun rayeh, luk miak nguit nedeh mangun ku demulun déi' Masir teh. Iamo' Iko ineh Allah luk maré do'; Iko luk méi' idi mawa idi na malé museh. Ei'Mu pelaba rayeh. Na Iko nenecan nedeh.

¹⁸ Ideh nenganau' aceh akang luk mepad kudeng sapi', luk titendeh Allah luk nguyut nedeh remuat rat bang bawang Masir! Pelaba datdeh Namu, O Tuhan!

¹⁹ Iamo' na Iko nenecan nedeh déi' su luk ali-ali, ngaceku éi'Mu luk pelaba rayeh. Idi na Iko nengalap laput idi apui ineh rat nedeh, ieh ineh luk mada' dalandeh kareb macang idi medacem.

²⁰ Ngaceku do'Mu, Iko luk nemada' luk ruendeh, idi nemaré ruti rat surga, idi abpa' luk rupendeh.

²¹ Bang apat ngepulu' lak rukeddeh tudo déi' su luk ali-ali, Iko nemaré amung-amung luk piandeh, idi ayungdeh na miak misu' idi kukuddeh na mebara'.

²² “Iko nemaré nedeh ngelaya' bawang idi imet luk baken, ieh ineh tana' luk libut-libut bawangdeh sebuleng. Ideh nengelaya' tana' Hesbon luk inimet Sihon, idi tana' Basan luk inimet Og.

²³ Iko luk nemaré anak luk mepad kinula' gituen luk déi' langit, idi nemaré nedeh ngalap idi tudo bang bawang luk pijani'Mu miak barén kuan tepundeh.

²⁴ Ideh nengalap tana' Kanaan, idi nengelaya' pupu bawang ineh. Iko nemaré lalud kuan pupuMu, pad ideh nenganau' luk piandeh kuan pupu idi raca' bawang Kanaan.

²⁵ PupuMu nengalap bawang luk linibung, tana' luk mebaleng, ruma' luk mepanu' ku binaweh, subuk luk inukat, saitun, bua', idi anggur. Ideh nekuman amung luk piandeh pad ideh melamu; idi ideh mawang niat ku amung-amung luk biréMu kuandeh.

²⁶ “Iamo' pupuMu sikal metueh rat Namu idi na maya' balaMu; ideh neteketed ratnan UkumMu. Ideh nengaté amung nabi luk nemada' nedeh, idi luk nengecuk nedeh lumi Namu. Idi ideh megéi' ngedat Namu,

²⁷ pad Iko nemaré bunu'deh nengelaya idi nengimet nedeh. Bang susa'deh ideh nemutuh Namu ngedengan nedeh, idi rat Surga Iko nengua' sembayangdeh. Ngaceku éi'Mu luk rayeh Iko nemaré nelun luk nguyut nedeh, luk nemuit nedeh ratnan bunu'deh.

²⁸ Kareb na inan susa' ideh nenganau' sala' teh, idi Iko nemaré bunu'deh nengelaya' nedeh. Iamo' kareb ideh nuren idi nemutuh Namu ngulun nedeh, idi Iko neninger rat bang surga; idi ngaceku éi'Mu luk pelaba rayeh, Iko megéi' ngulun nedeh ratnan susa'deh.

²⁹ Iko nengecuk nedeh maya' bada'Mu, iamo' ideh nengelaba balaMu dengan medita' niat, sagan pana' UkumMu luk mangun ku ulun kuandeh. Ideh ara' maya' ngaceku ideh metueh niat.

³⁰ Anid-anid lak Iko ngubuk nedeh. Nabi-nabiMu nepebala, iamo pupuMu mebengel, pad Iko nemaré pupu baken nengimet nedeh.

³¹ Iamo', ngaceku éi'Mu luk pelaba rayeh, na Iko nenecan idi ngaté nedeh. Iko ineh Allah luk mekatu idi méi'!

³² “O Allah kai, Iko pelaba rayeh! Iko melalud idi luk inan matot! Iko lutep maya' amung jani'Mu. Rat kareb kai pidereh raca' Asur, macing nekini kai pelaba dereh! Raca' kai, lun rayeh kai, imam idi nabi kai, tepun idi amung pupu kai medereh mo'. O Allah, ngerawé ratnan amung dereh kai.

³³ Petulu Iko nengukum nekai; Iko luk lutep, iamo' kai luk mesala'.

³⁴ Tepun kai, raca' kai, lun rayeh, idi imam kai, nengelaba UkumMu. Na ideh nemaya' bala idi bada'Mu.

³⁵ Ngaceku peruanMu, raca'-raca' nengimet pupuMu, kareb ideh tudo luun tana' luk mebaleng idi luk pelaba rayeh, iamo' na ideh nuren idi nemaya' Namu.

³⁶ Iamo' nekini kai ini demulun bang bawang luk biréMu nekai, ieh ineh tana' ini luk mebaleng luk maré akan kuan kai.

³⁷ Raca'-raca' luk biréMu ngimet nekai, ngaceku kai lun mesala'. ideh ineh luk ngalap bua'-bua' ratnan tana' ini. Ideh nganau' luk piandeh kuan kai idi kuan aya' kai. pad kai pelaba susa'!”

Lun Israil Nén Aceh Surat Pejani'

³⁸ Ngaceku amung luk pangeh nangun, kai lun Yahudi nengayud aceh jani' luk matu, idi lun rayeh kai, lun Liwi kai, idi imam kai nén surat jani' ini.