NEHEMIA 8 - BALA LUK DO'

Esra Maca' Ukum Musa Kuan Lun Mula'

¹ Kareb bulan luk ketudu' lun Israil lutep tudo bang bawangdeh. Idi aceh aco bulan ineh amungdeh nepamung déi' Yerusalim, luun natad luk pa atun Tanga' Abpa'. Ideh nemutuh Esra, ieh ineh imam luk mileh ngelio Ukum luk biré Allah nelun Israil dengan bala Musa, pad ieh ngalap Surat Ukum ineh

² Idi Esra nengalap neneh idi nenguit neneh kuan deléi, decur, idi anak luk petap rayeh kali' ilungneh.

³ Idi ieh nemaca' Ukum ineh kuandeh luun natad ineh luk pa atun Tanga' Abpa' ineh rat masat aco macing muned aco. Idi amungdeh neninger do'-do'.

⁴ Idi Esra netuped bang mimbar luk pinudut ratnan kayuh kuan aco ineh. Idi lemulun ini netuped pa tinuehneh: Matitia, Sima, Anaya, Uria, Hilkia, idi Masia. Idi lemulun ini netuped pa kabingneh: Pedaya, Misail, Malkia, Hasum, Hasbadana, Sekaria, idi Mesulam.

⁵ Kareb Esra netuped bang mimbar luk medita' ineh, idi ideh nenutong neneh. Idi kareb ieh nengukab surat ineh, idi amungdeh netuped.

⁶ Idi kebala Esra, “Ngubur Tuhan, Allah luk Rayeh!” Idi amungdeh nengiding ticu'deh idi nepebala, “Amin, amin!” Idi ideh netekeradung sembayang.

⁷ Idi amungdeh netuped, idi lun Liwi ini luk nengelio Ukum ineh kuandeh: Yesua, Bani, Serebaya, Yamin, Akub, Sabetai, Hodia, Masia, Kelita, Asaria, Yosabad, Hanan, idi Pelia.

⁸ Idi ideh ineh pana' nengelibal bala Ukum Allah ineh idi nengelio neneh bang buri' pupu ineh, pad ideh kali' ilungneh.

⁹ Kareb lun mula' neninger ilung Ukum ineh, niatdeh nesigio pad ideh nangi'. Idi kebala Nehemia, Esra, idi lun Liwi luk nengelio Ukum ineh nelun mula', “Aco sini meligan kuan Tuhan Allah muyuh. Aleg muyuh temido idi nangi'.

¹⁰ Do' muyuh muli' idi nganau' irau. Maré aceh babpat akan idi abpa' anggur muyuh kuan lemulun luk na petap akan. Aco sini meligan kuan Tuhan. Aleg mesusa' niat. Awang luk barén Tuhan nemuyuh ngetueh nemuyuh.”

¹¹ Lun Liwi nengubuk nelun mula', kebaladeh, “Aleg muyuh mesusa' niat, ngaceku aco sini meligan.”

¹² Idi amungdeh nuli' idi nekuman idi nengirup dengan mawang niat. Idi teh ideh nemaré aceh babpat kuan lun baken, ngaceku ideh nekali' ilung bala luk pindengerdeh.

Irau Lepo

¹³ Kenebpa amung lun rayeh inul, dengan amung imam idi lun Liwi iné' ni Esra, sikal sibada' ratnan Ukum.

¹⁴ Idi ideh kali' ratnan Ukum luk biré Tuhan dengan bala Musa, idi petulu lun Israil tudo bang lepo kareb Irau Lepo ineh.

¹⁵ Idi ideh nemaré bala ini aput Yerusalim idi bawang baken luk rayeh idi luk isuut, kebaladeh, “Amé' luun pegkung idi ngalap angat saitun luk tinibu, saitun pulung, hadas , piasau, idi kayuh baken luk miak ruen ku lepo maya' bala bang Surat Ukum.”

¹⁶ Idi lun mula' nengalap angat idi nemudut lepo luun apo ruma'deh luk mebalad, luun natad ruma'deh, luun natad Ruma' Allah, idi luun natad luk pa atun Tanga' Abpa', idi teh luun natad luk pa atun Tanga' Epraim.

¹⁷ Amung lemulun luk nuli' rat bawang su luk inandeh tiban nemudut lepo idi netudo bang ineh. Lun Israil nateh nenganau' luk kudeng ineh muci ratnan kareb Yusak Nun. Amung-amungdeh pelaba awang niat.

¹⁸ Rat aco luk pun-pun bang irau ineh macing aco luk kekiped ideh nemaca' aceh babpat Ukum Allah anid-anid aco. Ideh nenganau' aco rayeh tudu' aco kinioneh. Idi aco luk kewaluh inan aceh irau luk rayeh luk kekipedneh, maya' kudeng luk litep bang Surat Ukum.