NEHEMIA 6 - BALA LUK DO'

Lun Pegayam Sikal Metueh Rat Ni Nehemia

¹ Sanbalat, Tobia, Gesem, idi bunu' tau luk baken neninger bala ratnan kai pangeh nemangeh kekamen mudut libung, idi sebuleng song pana' nateh luk ketecan. (Iamo' nateh kai nenganau' itek tanga'.)

² Sanbalat idi Gesem neneteng negku papu' nedidueh bang aceh bawang déi' luun Raked Ono. Iamo' didueh pian naluk negku.

³ Idi ui nengecuk nelun dukenku mada' nedidueh, kebaladeh, “Nehemia uned nganau' aceh kekamen luk rayeh, idi na ieh miak ucu' pad amé' papu' nemedueh.”

⁴ Apat kua' didueh neneteng negku, idi anid kua' ui nengor bala didueh kudeng ineh.

⁵ Idi Sanbalat neneteng negku luk kelimeh kua'. Idi ieh nemaré surat luk na ebpu, iten seburur demulunneh.

⁶ Kebaladeh: “Kebala Gesem, ‘Lun pupu baken luk libut-libut Yerusalim mala, iko idi lun Yahudi sikal metueh ratnan raca' Babil, idi ini punneh muyuh nemudut libung ineh baruh. Idi teh iko pian mangun ku raca'.

⁷ Idi teh iko pangeh nengecuk tuda'-tuda' nabi mada' déi' Yerusalim ratnan iko mangun ku raca' Yahuda.’ Kali' rungen raca' Babil miak ninger bala ini, idi do' kiteh papu' idi pegayam ratnan ineh.”

⁸ Idi ui nemaré bala neneh, “Amung bala luk bang suratmu ineh na matu. Iko mebalih mo'.”

⁹ Ideh sikal ngatot nekai, pad kai ugka' ngakem. Iamo' kesembayangku, “Nekini, Allah, ngetueh negku!”

¹⁰ Kareb ineh Semaya, anak Delaya Metabel na miak mepai, idi ui iné' ngikak neneh. Idi kebalaneh negku, “Do' kiteh sigapung bang Su luk Meligan déi' bang Ruma' Allah, idi ngitek tanga', ngaceku ideh pian amé' ngaté namu. Ideh macing kareb medacem sikal ngaté namu.”

¹¹ Idi kebalaku, “Na ui seburur lemulun luk pian sigapung. Miakké ui ngulun bururku idi sigapung bang Ruma' Allah? Na tu-tu!”

¹² Kareb ui nengerawé ratnan bala Metabel, idi ui kali' baken Allah luk nepebala neneh, iamo' Tobia idi Sanbalat luk pangeh nemaré usin kuanneh, pad ieh naluk negku.

¹³ Didueh nenabpar neneh, pad ieh ngatot negku pelé ui nganau' sala'. Ideh pian ngigu' negku pa kiung lun baken.

¹⁴ Idi kesembayangku, “O Allah, ngerawé kekamen Tobia idi Sanbalat, idi ngukum nedidueh. Idi ngerawé nabi decur Nodia, idi teh amung nabi baken luk sikal ngatot negku.”

Kekiped Kekamen Kai Mudut Libung

¹⁵ Pangeh kai nengakem limeh ngepulu' dueh aco, idi kai nemangeh libung ineh, ieh ineh dueh ngepulu' limeh aco bulan Elul.

¹⁶ Kareb bunu' kai luk libut-libut Yerusalim nekali' bala ineh, idi ideh migu', ngaceku amung-amung lemulun kali' idi kekamen ineh pangeh inau' ngaceku pedengan ratnan Allah.

¹⁷ Ruked kai ngakem, lun rayeh-rayeh Yahudi idi Tobia pebaré surat.

¹⁸ Mula' lun Yahuda bang rurum Tobia, ngaceku ieh iban Sekania Ara. Meluun teh, anakneh Yohanan pangeh nengaweh anak decur Mesulam Berekia.

¹⁹ Lun Yahuda ineh megéi' mada' negku ratnan kekamen Tobia luk do'. Idi ideh ngatum balaku neneh. Idi na ieh ugka' maré surat sikal ngatot negku.