NEHEMIA 5 - BALA LUK DO'

Nehemia Ngatur Nelun Yahudi

¹ Muci ratnan ineh mula' deléi idi decur lun Yahudi medureng arangdeh sebuleng.

² Idi kebala sebuangdeh, “Mula' kai bang tetek ruma' kai. Na kai miak mulun kudeng na petap padé'.”

³ Idi kebala lun baken, “Kai pangeh nemaré lati', kabun anggur, idi ruma' kai ku duduk, pad kai ngalap padé idi na maté.”

⁴ Idi kebala lun baken teh, “Na miak na kai ngabit usin, pad kai ngua' acam lati' idi kabun anggur kai kuan raca'.

⁵ Petulu kai ngalap amung-amung luk lapen lun Yahudi luk baken. Anak kai mepad do' kudeng anakdeh. Iamo' na miak na anak kai mangun ku demulun. Sebuang anak kai luk decur pangeh pinasui mangun ku demulun. Kai pelaba laya' ngaceku lati' idi kabun anggur kai pangeh ilap rat nekai.”

⁶ Kareb ui ini Nehemia neninger baladeh luk medureng, idi ui megateh niat,

⁷ pad ui nengayud nelun rayeh-rayeh, kebalaku, “Muyuh ngedereh kinanak-kinanak muyuh!” Idi ui nengamung nelun mula', pad kai miak mutut ratnan susa' ini,

⁸ kebalaku, “Maya tueh tau, tau pangeh nenguli' kinanak tau lun Yahudi luk pangeh pinasui mangun ku demulun pupu baken. Nekini muyuh mesaad, pad kinanak muyuh sebuleng pisuen kuan lun Yahudi luk baken!” Lun rayeh-rayeh ineh nepirud, ngaceku na luk miak beléndeh.

⁹ Idi kebalaku teh, “Sala' luk ruen muyuh ineh! Petulu muyuh matot inan Allah idi nganau' luk matu, pad bunu' tau lun pupu baken na miak situnga netau.

¹⁰ Ui nenima' nelun mula' ngabit usin idi padé pana' rat negku. Idi kudeng ineh teh lun rurumku idi lun dukenku. Idi rat pad sini do' tau na mupud baleh.

¹¹ Idi do' tau maré lemubed lati', kabun anggur, kabung saitun, idi teh ruma'deh. Do' ngagka' balehdeh nemuyuh — usin, padé, abpa' anggur, idi umau pana'.”

¹² Idi lun rayeh-rayeh nengor balaku, “Miak kai maya' balamu, idi maré amung binaweh ineh lemubed, idi na mupud baleh.” Idi ui nenawar amung imam idi nengecuk nelun rayeh-rayeh ineh pebulung pad ideh maya' jani'deh.

¹³ Idi ui nenaka abet awa'ku idi nengegkar idi, kebalaku, “Kudeng ineh teh Allah miak ngegkar idé-idé rat arang muyuh luk na maya' jani'neh ineh. Allah miak ngalap ruma' muyuh idi amung-amung binaweh muyuh, pad na luk ketecan nemuyuh.” Idi amung-amungdeh nepebala, “Amin!” Idi ideh nengubur Tuhan. Idi ideh nemaya' jani'deh ineh.

Nehemia Na Ngerawé Bururneh Sebuleng

¹⁴ Ruked pulu' dueh lak kareb ui pengulu déi' tana' Yahuda, ieh ineh rat lak luk kedueh ngepulu' kareb imet Artasasta macing lak luk keteluh ngepulu' dueh bang imetneh, ui idi pupuku na nekuman akan luk kuan pengulu.

¹⁵ Pengulu-pengulu luk ngimet atun rat negku mangun ku aceh babeh luk meberat kuan lun mula' ngaceku ideh nemutuh apat ngepulu' balad pirak seaco ku melihdeh akan idi abpa' anggur. Demulundeh pana' nengedereh nelun mula'. Iamo' na ui nenganau' kudeng ineh, ngaceku ui matot inan Allah.

¹⁶ Ui mekél dengan amung tuehku mudut libung ineh. Idi na ui nengalap sesuut tana' pana'. Amung-amung lun dukenku peruyung mudut denganku.

¹⁷ Ui megéi' maré akan kuan meratu limeh ngepulu' lun Yahudi idi lun rayeh-rayehdeh, dengan amung lemulun luk iné' negku rat bawang luk libut-libut Yerusalim.

¹⁸ Anid-anid aco ui ngeret sebuleng sapi', anem dumba luk melamu, idi teh mula' lal. Idi anid-anid pulu' aco ui maré abpa' anggur luk mebaruh. Sagan tu pana' kudeng ineh nateh ui nemutuh tabpar pengulu, ngaceku babeh lun mula' ineh pelaba berat.

¹⁹ Kesembayangku, O Allah, ui mutuh Namu ngerawé kekamenku luk do' kuan pupu ini.