NEHEMIA 4 - BALA LUK DO'

Lun Sikal Metueh Ratnan Kekamen Nehemia

¹ Idi kareb Sanbalat neninger bala ratnan kai mudut libung ineh, idi ieh pelaba gateh niat, idi ieh nesitunga nekai lun Yahudi.

² Idi kebala Sanbalat pa kiung lun rurumneh di baweh lun Samaria, “Anun luk ruen lun Yahudi luk melaya' ineh? Miakké ideh mudut bawang ineh baruh? Miakké ideh maré baré idi mangeh kekamen ineh bang seaco mo'? Miakké ideh nganau' batu luk do' ratnan teceh batu luk neseb teh?”

³ Idi kebala Tobia, lun Amon luk tuped iringneh, “Anunké luk pidutendeh? Kudeng inan bungalé manad libung batu ineh kali' rungen ineh metabpa!”

⁴ Idi ui ini Nehemia nesembayang, kesembayangku, “O Allah kai, ninger, ngaceku kai ini luk inandeh situnga. Do' ngelubed kuyodeh amé' luun bururdeh sebuleng, pad ideh pana' tebanen idi uen ngaro.

⁵ Aleg maré do' ku sala'deh, idi aleg ngiu' sala'deh, ngaceku ideh pangeh nengeruat usehMu pa kiung kai luk mudut ini.”

⁶ Idi kai nemudut libung ineh, idi amung libung ineh tinutum pad macing setangal dita'neh. Ngaceku lun mula' ineh metueh ngakem.

⁷ Iamo' kareb Sanbalat, Tobia, lun Arab, lun Amon, idi lun Asdod neninger bala ratnan kai nemudut libung Yerusalim idi nengedo' luk pangeh inusag ineh, idi ideh pelaba useh.

⁸ Idi ideh neperurum sikal metueh rat nelun Yerusalim idi ngagau bawang ineh.

⁹ Idi kai nesembayang pa kiung Allah kai, idi nematar bawang Yerusalim tebaco kedangan.

¹⁰ Iamo' lun Yahuda inan aceh nani, kenanideh, “Kai na miak mudut libung ini aco sini, Ngaceku lun luk ngakem ineh melaya', Idi mula' arap teh.”

¹¹ Idi kebala bunu' kai, “Kudeng kai semuet arangdeh idi ngaté nedeh idi ngagka' kekamen ineh, kali' rungen ideh na kali' nekai.”

¹² Kareb lun Yahudi luk tudo arangdeh macing, ideh megéi pebala, “Ideh miak amé' pebunu' nekai ratnan anid-anid bawangdeh.”

¹³ Ngaceku ineh ui nengeletep nelun mula' ineh, maya' tetek ruma'deh, dengan pelapet, busu, idi binordeh, su libung luk nateh nepangeh.

¹⁴ Idi ui nekali' lun mula' ineh merapang, idi kebalaku kuan lun rayehdeh, “Aleg matot ku bunu' tau. Do' ngerawé Tuhan luk meluun rayeh idi luk inan matot, idi pebunu' ku libal kinanak muyuh, anak muyuh, awan muyuh, idi ruma' muyuh.”

¹⁵ Kareb bunu' kai nekali' kai neninger ratnan terawédeh idi ratnan Allah pangeh nengusag luk tirawédeh ineh, idi amung kai nelemubed mudut libung ineh.

¹⁶ Rat pad sineh sebuang lun dukenku nemudut libung idi sebuang nengimet busu, utap, binor, idi ayung pebunu'. Idi amung lun rayeh lun Yahuda nengedengan anak itindeh

¹⁷ luk mudut libung ineh. Idi lun luk maan ngimet luk panendeh ku ticu'deh selipa, idi selipa ngimet pelapet.

¹⁸ Idi anid lun luk mudut libung ineh ngabin pelapet. Idi lun luk ngiup serupit tuped iringku.

¹⁹ Idi kebalaku kuan lun rayeh-rayeh idi lun mula', “Kekamen tau ini rayeh, idi mado arang tau, idi tau urap luun libung ini.

²⁰ Kudeng muyuh ninger uni serupit, do' muyuh amé' negku. Allah tau miak pebunu' kuan tau.”

²¹ Idi kai metueh ngakem, idi sebuangdeh ngimet busu rat masat aco macing acep aco.

²² Idi kebalaku kuan lun mula' kareb ineh teh, “Do' anid-anid lemulun idi lun dukenneh tudo tungé' Yerusalim anid alem, pad ideh matar netau medacem, idi maco ideh ngakem.”

²³ Ngaceku ineh ui idi lun rurumku, lun dukenku, idi lun luk matar luk maya' negku na miak lungu ratnan ayung tau. Idi anid burur tau temina' ku repapeh pebunu'.