NEHEMIA 3 - BALA LUK DO'

Ideh Mudut Libung Yerusalim Baruh

¹ Idi Eliasib, Imam Rayeh nengimun mudut Tanga' Dumba dengan imam-imam luk baken. Idi ideh nesembayang ku ineh idi nenganau' itekneh. Ideh nemudut ineh baruh macing Pudut luk Medita' lu titen Ratu, idi teh macing Pudut luk Medita' luk titen Hananel.

² Idi lun Yeriko nemudut iring Eliasib. Idi Sakur Imri nemudut iring lun Yeriko.

³ Idi pupu Hasena nemudut Tanga' Lawid. Ideh nenganau' atangneh, idi itekneh dengan palinneh.

⁴ Idi lun luk iringneh, Meremot, anak Uria Hakos nemudut. Idi lun luk iringneh, Mesulam, anak Berekia Mesesabel nemudut. Idi lun luk iringneh, Saduk Bana nemudut.

⁵ Idi lun luk iringneh, lun Tekoa nemudut ineh. Iamo' lun rayehdeh ara' metueh ngakem kuan tuandeh.

⁶ Idi Yoyada Pasia, idi Mesulam Besodia nemudut Tanga' Mon. Idi didueh nenganau' atangneh, idi itekneh dengan palinneh.

⁷ Idi lun luk iringdeh, Melatia lun Gibion idi Yaden lun Meronot, lun Gibion idi lun Mispa nemudut macing ruma' lun rayeh bawang par tungé' Abpa' Pirat.

⁸ Idi lun luk iringdeh, Usiel Haraya, lun luk tukang amas nemudut. Idi lun luk iringneh, Hanania, lun luk nganau' luk do' buen nemudut macing nan Libung Rayeh.

⁹ Idi lun luk iringneh, Repaya Hur, ieh ineh lun rayeh setangal bawang Yerusalim, nemudut.

¹⁰ Idi lun luk iringneh, Yedaya Harumap nemudut libung luk muneng ku ruma'neh. Idi lun luk iringneh, Hatus Hasabenia nemudut.

¹¹ Malkia Harim idi Hasub anak Pahat Moab nemudut aceh babpat libung, idi teh Pudut luk Medita' luk titen Tetel.

¹² Idi lun luk iring didueh, Salum Haloes, ieh ineh lun rayeh setangal bawang Yerusalim nemudut dengan anak-anakneh luk decur.

¹³ Hanun idi lun bang bawang Sanua nemudut Tanga' Ruan. Idi ideh nemudut tanga' ineh baruh, idi nenganau' itekneh idi palinneh, idi nemudut baruh 250 depeh libung ineh macing Tanga' Téi'.

¹⁴ Malkia Rekab, lun rayeh bawang Bait Kerim nemudut baruh Tanga' Téi' idi nenganau' itekneh idi palinneh.

¹⁵ Idi Salum Kolosi, lun rayeh bawang Mispa nemudut baruh Tanga' Bued Apba'. Idi ieh nenganau' aponeh, itekneh, idi palinneh. Idi ieh nemudut ar Takung Sila luk bang kabun raca', macing ican batu luk dalan temurun rat Bawang Daud.

¹⁶ Idi lun luk iringneh, Nehemia anak Asbuk, lun rayeh setangal bawang Baitsur nemudut macing su luk petutup ku tanem Raca' Daud, idi macing ku takung luk inau' lemulun idi ruma' lun luk metueh.

Ngadan Lun Liwi Luk Mudut Libung Ineh

¹⁷ Idi lun luk iring Nehemia Asbuk, ieh ineh lun Liwi: Rehum Bani nemudut su ineh. Idi lun luk iringneh, Hasabia, lun luk rayeh setangal bawang Kila, nemudut kuan bawangneh.

¹⁸ Idi lun luk iringneh, Babai Henadad, lun rayeh setangal bawang Kila nemudut.

¹⁹ Idi lun luk iringneh, Eser Yesua, lun rayeh bawang Mispa, nemudut aceh babpat libung luk petutup ku ican luk dalan mudik amé' ruma' su luk inan nganug ayung pebunu' déi' lidung.

²⁰ Idi lun luk iringneh, Baruk Sabai nemudut aceh babpat libung macing munung tanga' ruma' Eliasib, Imam Rayeh ineh.

²¹ Idi lun luk iringneh, Meremot, anak Uria Hakos, nemudut babpat libung rat munung tanga' ruma' Eliasib macing papedneh selipa.

Ngadan Imam Luk Mudut Libung Ineh

²² Idi ini ngadan imam-imam luk ngedengan nedeh mudut libung: Idi lun luk iring Meremot, ieh ineh imam-imam.

²³ Beniamin idi Hasub nemudut aceh babpat libung luk petutup ku ruma' didueh ineh. Idi lun luk iring didueh, Asaria anak Masia Anania nemudut aceh babpat libung iring ruma'neh sebuleng.

²⁴ Idi lun luk iringneh, Binui Henadad nemudut aceh babpat libung rat ruma' Asaria macing ku lidung libung.

^25-26 Idi Palal Usi nemudut aceh babpat libung luk petutup ku lidung idi pudut luk medita' luk pa luun ruma' raca', idi luk luun natad lun luk nginita ruma'. Idi lun luk iringneh, Pedaya Paros nemudut aceh babpat macing su luk petutup ku Tanga' Abpa' pa busat aco idi pudut luk medita' ineh. (Ieh ineh muneng ku babpat bawang luk titen Opel, su luk inan lun duken bang Ruma' Allah tudo.)

Ngadan Lun Baken Luk Mudut

²⁷ Idi lun luk iringneh, lun Tekoa nemudut babpat libungdeh luk kedueh, ieh ineh rat su luk petutup ku pudut luk medita luk matar Ruma' Allah macing ku libung Opel.

²⁸ Rat Tanga' Kuda anid-anid imam nemudut aceh babpat libung luk petutup ku ruma'neh sebuleng.

²⁹ Idi lun luk iringdeh, Saduk Imer nemudut libung luk petutup ku ruma'neh sebuleng Idi lun luk iringneh, Semaya Sekania, lun luk nginita Tanga' Pa Busat Aco nemudut.

³⁰ Idi lun luk iringneh, Hanania Selemia, idi Hanun anak Salap luk keanem nemudut babpatdeh luk kedueh. Idi lun luk iringneh Mesulam Berekia nemudut libung luk petutup ku takepneh.

³¹ Idi lun luk iringneh, Malkia, seburur lun luk tukang amas, nemudut libung macing ku ruma' lun duken bang Ruma' Allah, idi teh ruma' lun luk pepua', luk petutup ku Tanga' luk Inan Ngamung idi macing su takep luk pa luun lidung.

³² Idi amung tukang amas idi lun luk pepua' nemudut arang takep luk pa luun lidung ineh idi teh Tanga' Dumba.