NEHEMIA 2 - BALA LUK DO'

Nehemia Amé' Yerusalim

¹ Kareb ineh ui ini lun rayeh lun luk nguit luk rupen kuan raca. Idi bang bulan Nisan bang lak luk kedueh ngepulu' bang imet Raca' Artasasta, kareb ieh kuman, idi ui nenguit abpa' anggur kuan raca' ineh. Idi kareb ui tuped pa kiungneh, ui pelaba dat niat.

² Idi kebala raca' negku, “Ngudeh iko dat niat? Ngaceku na iko mét. Iko dat niat mo'.” Idi ui pelaba tot.

³ Idi kebalaku kuan raca', “Do' raca' mipu ulun! Kali' rungen ui dat niat, ngaceku bawang su luk inan tanem tepunku inusag, idi tanga' bawang pana' pangeh iseb.”

⁴ Idi kebala raca' negku, “Anun luk pianmu negku?” Idi ui nesembayang inan Allah Surga.

⁵ Idi ui nengor bala raca', “Kudeng petulu pa kiung raca' idi kudeng iko méi' negku, do' maré negku amé' déi' Yahuda, ieh ineh bawang su luk inan tanem tepunku ineh, pad ui miak mudut bawang ineh baruh.”

⁶ Idi kebala raca' negku (idi raca' decur tudo iringneh,) “Anun kinio lawému, idi iko muli'?” Idi raca' nengecuk negku nalan. Idi ui nengeletep kinioneh.

⁷ Idi kebalaku inan rica', “Kudeng petulu pa kiungmu, do raca maré tuda'-tuda' surat kuan amung lun rayeh bawang déi' dipar Abpa' Pirat, pad ideh maré negku lemaba bawangdeh, pelé ui macing déi' Yahuda,

⁸ idi aceh surat kuan Asap, lun luk nginita pulung raca', pad ieh maré kayuh ku atang tanga' su luk meraben iring Ruma' Allah, idi teh ku libung luk meraben déi' bawang Yerusalim, idi teh ku ruma'ku sebuleng.” Idi raca' nemaré luk pinutuhku, ngaceku Allahku nengedengan negku.

⁹ Idi ui iné' inan lun rayeh bawang déi' dipar Abpa' Pirat, idi ui nemaré amung surat raca' ineh nedeh. Idi raca' pangeh nemaré tuda'-tuda' lun rayeh baweh idi lun luk maya' kuda nemaya' negku.

¹⁰ Iamo' kareb Sanbalat, lun Bait Horon, idi Tobia, lun duken lun Amon, nekali' bala ineh, idi didueh pelaba dat niat, ngaceku inan seburur lun nacing sikal nganau' luk do' kuan lun pupu Israil.

¹¹ Idi kareb ui nacing déi' Yerusalim, idi ui netudo teluh aco.

¹² Idi ui netumui tangal dacem dengan tuda'-tuda' lun denganku, idi na ui nemada' luk bida' Allah bang niatku, ratnan luk ruenku kuan Yerusalim, idi na keladai baken ratnan luk pakaiku.

¹³ Idi ui neremuat maya' Tanga' Ruan macing Subuk Galau idi Tanga' Téi', idi ui nenier libung Yerusalim luk pangeh tibpa idi teh amung tanga'neh luk pangeh iseb.

¹⁴ Idi ui nenalan macing Tanga' Bued Abpa' idi teh macing Takung Raca', iamo' na luk idi dalan kuan keladaiku.

¹⁵ Idi malem ineh teh ui nemaya' ruan idi nenier libung ineh. Pangeh ineh idi ui nelemubed maya' Tanga' Ruan ineh.

¹⁶ Idi lun rayeh-rayeh na nekali' ratnan lawéku idi luk inau'Ku. Idi nateh ui nemada' nelun Yahudi, ieh ineh lun imam, lun luk ngimet, lun luk rayeh, idi lun mula' luk miak nganau' kekamen ineh.

¹⁷ Idi kebalaku nedeh, “Muyuh kali' susa' tau ratnan Yerusalim pangeh inusag idi tanga'neh pangeh iseb. Do' tau mudut libung luk meraben déi' Yerusalim pad tau na migu'.”

¹⁸ Idi ui nemada' nedeh ratnan kudeng apeh Allah pangeh nengeperuan negku, idi teh ratnan bala raca' negku. Idi kebaladeh, “Do' tau amé' mudut ineh baruh.” Idi ideh nengimun ngakem dengan ran niat.

¹⁹ Iamo' kareb Sanbalat, Tobia, idi Gesan lun Arab nekali' bala ineh, idi ideh nesitunga nekai, kebaladeh, “Anunké luk ruen muyuh? Muyuh pian metueh ratnan raca'ké?”

²⁰ Idi ui nengor baladeh, “Allah Surga miak ngeperuan nekai, idi kai luk demulunNeh miak mudut libung ineh, iamo' muyuh na babpat, idi na lalud, idi na miak teruayen déi' Yerusalim.”