NEHEMIA 13 - BALA LUK DO'

Lun Israil Patad Rat Nelun Pupu Baken

¹ Kareb ineh Ukum Musa uned uen maca' kuan lun Israil. Idi ideh nacing ayat luk mada' ratnan lun Amon idi lun Moab bibpeng na miak peruyung dengan pupu Allah.

² Ngaceku lun Amon idi lun Moab na nemaré balu' idi luk rupen kuan lun Israil kareb ideh neremuat rat bang bawang Masir. Iamo' ideh nenabpar ni Bilam pad ieh miak ngediman nelun Israil, iamo' Allah kai nengisu' kedimandeh mangun ku peruan.

³ Kareb lun Israil neninger ukum ineh uen maca' idi ideh nengecuk amung lun pupu baken buro rat arangdeh.

Nehemia Ngedo' Tuda'-tuda' Adat Luk Dat

⁴ Imam Eliasib, luk ngimet su luk inan nganug binaweh bang Ruma' Allah perurum ni Tobia rat mon.

⁵ Ieh nemaré ni Tobia makai aceh takep luk rayeh luk litep kuan su luk inan nganug padé idi umau luk do' buen, repapeh luk uen makai bang Ruma' Allah, baré kuan imam-imam, babpat pulu' ratnan padé, abpa' anggur, idi umau saitun luk biré kuan lun Liwi, lun luk menani, idi lun luk nginita Ruma' Allah.

⁶ Kareb ineh ui ini Nehemia na idi déi' Yerusalim, ngaceku bang lak luk keteluh ngepulu' dueh, kareb imet Artasasta, raca' Babil, ui pangeh iné' nguit bala kuanneh. Idi muci ratnan ineh ui sinima'neh

⁷ muli' amé' Yerusalim. Idi ui negagap nenier Tobia sinima' Eliasib makai aceh takep bang Ruma' Allah.

⁸ Idi ui pelaba gateh niat, pad ui nala' amung binaweh Tobia,

⁹ Idi ui nengecuk nedeh ngeligan amung takep ineh idi ngelubed amung repapeh Ruma' Allah dengan baré padé, idi umau luk do' buen.

¹⁰ Idi teh ui kali' nelun Liwi idi lun luk menani bang Ruma' Allah pangeh neburo rat Yerusalim idi nenganau' lati' ngaceku lun Israil na nemaré petap akan.

¹¹ Idi ui metueh mada' nelun rayeh-rayeh ngaceku ideh nima' Ruma' Allah tacin. Idi ui nenguit nelun Liwi idi lun luk menani lemubed amé' bang Ruma' Allah, idi nengecuk nedeh ngakem baruh.

¹² Idi lun Israil nenguit babpat pulu'deh ratnan pade, abpa' anggur, idi umau saitun amé' bang su luk inan nganug repapeh bang Ruma' Allah.

¹³ Idi ui nengecuk lemulun ini ngimet su luk inan nganug repapeh: Selemia, lun imam; Saduk, lun luk mileh ngelio ukum; idi Pedaya, lun Liwi. Idi Hanan, anak Sakur Matania nengedengan nedeh. Ui kali' ui miak merapet nan lemulun ini luk miak maré akan petap kuan lun rurumdeh bang kekamen Allah.

¹⁴ Idi kesembayangku, O Allah, ngerawé amung luk inau'ku kuan ruma'Mu, pad lun Israil miak sembayang Namu.

¹⁵ Kareb ineh, ui nenier nelun Yahuda nengeradu' bua' anggur pad ngalap abpa'neh kareb Aco luk inan Mudeng. Idi teh lun baken nguit padé, abpa' anggur, bua' anggur, bua' gita', idi teh luk baken-baken luun keted keladaideh amé' Yerusalim. Ui nemebpeng nedeh na miak masui kareb Aco luk inan Mudeng ineh.

¹⁶ Inan lemulun rat Sur luk tudo' dé'i Yerusalim luk nguit lawid idi luk baken-baken luk pisuen kuan lun Israil bang bawang ineh kareb Aco luk inan Mudeng.

¹⁷ Ui metueh mada' nelun rayeh lun Yahudi, kebalaku nedeh, “Pelaba dat kekamen muyuh! Muyuh ngelutak Aco luk inan Mudeng.

¹⁸ Ngaceku kekamen luk kudeng ineh, Allah nengukum tepun muyuh, kareb Ieh nengusag bawang ini. Iamo' muyuh ngacing useh Allah luk meluun rayeh kuan lun Israil ngaceku muyuh ngelutak Aco luk inan Mudeng.”

¹⁹ Ui nengecuk nedeh ngitek amung tanga' bawang kareb pun Aco luk inan Mudeng, ieh ineh kareb aco macep, idi na ngukab tanga' ineh pad mabud Aco luk inan Mudeng. Ui nengecuk sebuang lun dukenku tuped munung amung tanga' pad mebpeng lemulun na miak nguit anun-anun kareb Aco luk inan Mudeng.

²⁰ Dueh kua' lun luk pepua' nemasui tuda'-tuda' binaweh bal libung Yerusalim malem aco limeh.

²¹ Ui nemada' nedeh, “Na ulekneh tudo nganét macing macang aco. Kudeng muyuh nganau' kudeng ini sekua' teh ui miak ngakem nemuyuh.” Rat pad sineh na ideh iné' kareb Aco luk inan Mudeng.

²² Ui nengecuk nelun Liwi amé' matar amung tanga' bawang, pad Aco luk inan Mudeng miak uen ngeligan. Idi kesembayangku, O Allah, ngerawé negku, ngaceku kekamenku ini, idi méi' negku, ngaceku awaMu luk pelaba rayeh.

²³ Kareb ineh teh ui nekali' mula' lun Yahudi pangeh nengalap decur ku awandeh rat Asdod, Amon, idi Moab.

²⁴ Sebuang anakdeh mileh buri' Asdod, kian buri' baken lek, iamo' na ideh kali' buri' kai sebuleng.

²⁵ Idi ui metueh mada' deléi ineh idi nemutuh Tuhan ngediman nedeh. Ui nemebal nedeh idi nemubput abpukdeh. Idi ui nengecuk nedeh pebulung ku ngadan Allah, pad ideh idi anakdeh pana' na ngaweh nelun pupu baken.

²⁶ Kebalaku nedeh, “Decur ratnan pupu baken luk nenguit Raca' Selimun ngana' sala', sagan pana' ieh luk meluun rayeh ratnan amung-amung raca' pupu baken, idi sagan pana' Allah mawa neneh idi nenganau' neneh mangun ku raca' amung lun Israil.

²⁷ Petuluké kai maya' lawé muyuh luk dat, pad kai ngelaba bala Allah idi ngaweh decur ratnan pupu baken?”

²⁸ Yoyada, ieh ineh anak Imam Rayeh, Eliasib. Iamo' sebuleng anak Yoyada nengaweh anak decur Sanbalat, rat Bait Horon. Ngaceku ineh ui nengecuk neneh buro rat Yerusalim.

²⁹ Idi kesembayangku, O Allah, ngerawé ratnan dat lemulun luk nengelutak kekamen imam idi teh pejani' luk inau'Mu dengan imam-imam idi lun Liwi.

³⁰ Ui nengeligan nelun Israil ratnan amung-amung kekamen luk rat nelun pupu baken. Ui nenganau' ukum-ukum kuan lun imam idi lun Liwi, pad amung-amungdeh miak kali' kekamendeh.

³¹ Ui nengecuk nelun Israil nguit kayuh ku ngeseb baré luk sabpen bang kareb luk petulu. Idi teh ui nengecuk nguit baré padé luk pun piranih idi bua' luk pun melak. Idi kesembayangku, O Allah, ngerawé amung kekamen ini, idi ngeperuan negku.