NEHEMIA 12 - BALA LUK DO'

Ngadan Imam Idi Lun Liwi

¹ Idi ini ngadan imam idi lun Liwi luk nuli' rat bawang su luk inandeh tiban dengan Serubabel Saltiel, idi Imam Rayeh Yosua.

^2-7 Imam-Imam: Seraya, Yeremia, Esra, Amaria, Maluk, Hatus, Sekania, Rehum, Meremot, Ido, Ginetoi, Abia, Miamin, Madia, Bilga, Semaya, Yoyarib, Yedaya, Salu, Amok, Hilkia, idi Yedaya. Lemulun ini luk lun rayeh imam-imam kareb Yosua.

⁸ Lun Liwi: Ini ngadan lemulun luk nguyut menani ubur: Yesua, Binui, Kadmil, Serebia, Yahuda, idi Matania.

⁹ Ini ngadan lemulun luk menani ngor ilung nani ineh: Bakbukia, Uno, idi lun Liwi luk baken.

Inul Imam Rayeh Yosua

¹⁰ Yosua ineh taman Yoyakim. Yoyakim nenginul Eliasib; Eliasib nenginul Yoyada;

¹¹ Yoyada nenginul Yonatan; idi Yonatan nenginul Yadua.

Lun Rayeh Inul Imam

^12-21 Kareb Yoyakim Imam Rayeh, lemulun ini mangun ku lun rayeh imam: Imam Inul Meraya Seraya Hanania Yeremia Mesulam Esra Yohanan Amaria Yonatan Maluki Yusup Sebania Adna Harim Helkai Merayot Sekaria Ido Mesulam Gineton Sikri Abia I kaceh Miniamin Piltai Modia Samua Bilga Yehonatan Semaya Matenai Yoyarib Usi Yedaya Kalai Salai Eber Amok Hasabia Hilkia Netanel Yedaya

Imam Inul Surat Inul Tetek Ruma' Imam Rayeh Idi Lun Liwi

²² Aceh surat inul lun rayeh tetek ruma' lun Liwi idi imam-imam pangeh inayud kareb Imam-Imam Rayeh ini mulun: Eliasib, Yoyada, Yohanan, idi Yadua. Idi surat inul ini inayud macing kareb bang imet Darius, raca' Parsi.

²³ Ngadan amung lun rayeh tetek ruma' lun Liwi pangeh inayud bang surat inul macing kareb Yohanan luk mupun Eliasib.

Kekamen Bang Ruma' Allah Pangeh Litep

²⁴ Lun Liwi luk pa liang imet Hasabia, Serebia, Yesua, Binui, idi Kadmil pangeh bibpat. Idi dueh babpat pelibal-pelibal ngubur Allah, maya' bada' luk biré Raca' Daud, demulun Allah.

²⁵ Ini ngadan lemulun luk nginita Ruma' Allah luk matar su luk inan nganug binaweh muneng ku amung tanga' Ruma' Allah: Matania, Bakbukia, Obadia, Mesulam, Talmon, idi Akub.

²⁶ Amung lemulun ini mulun kareb Yoyakim anak Yosua Yehosadak, idi kareb Pengulu Nehemia, idi kareb Imam Esra luk mileh ngelio Ukum Musa.

Ideh Sembayang Ratnan Libung Bawang

²⁷ Kareb ideh sembayang ratnan libung bawang Yerusalim, idi lun Liwi pangeh pimung ratnan anid-anid su luk inandeh tudo, pad amung-amungdeh miak ngerayeh aco ineh dengan mawang niat, idi dengan nani ubur, idi dengan uni karing idi teh giula'.

²⁸ Lun Liwi luk menani nacing rat bawang luk libut-libut Yerusalim, idi teh rat bawang luk libut-libut Netopa,

²⁹ idi teh rat Baitgilgal, Giba, idi Asmabet, su luk inandeh pangeh netebawang.

³⁰ Amung imam idi lun Liwi nengeligan bururdeh sebuleng idi lun mula' pana'. Idi ideh nesembayang kuan amung tanga' bawang idi teh libung bawang.

³¹ Idi ui ini Nehemia nengamung nelun rayeh-rayeh Yahuda luun libung ineh, idi nemabpat nedeh dueh babpat luk rayeh luk miak nalan libut-libut bawang, idi maré ubur kuan Allah. Idi sebabpat iné' pa kabing maya' luun libung ineh matun Tanga' Téi'.

³² Idi Hosaya nenalan pa puet lun luk menani idi pa atun sebuang lun rayeh Yahuda.

^33-35 Idi imam-imam ini luk ngiup serupit nemaya' puetdeh: Asaria, Esra, Mesulam, Yahuda, Beniamin, Semaya, idi Yeremia. Idi Sekaria, anak Yonatan Semaya nemaya' puetdeh. (Idi arang tepunneh inan Matania, Mikaya, idi Sakur, luk ratnan inul Asap.)

³⁶ Idi tuda'-tuda' burur lun baken ratnan inulneh nemaya' puetneh, ieh ineh: Semaya, Asarel, Milalai, Gilalai, Mai, Netanel, Yahuda, idi Hanani. Idi amungdeh nengimet giula' mepad kudeng luk pikai Raca' Daud, demulun Allah Esra, lun mileh ineh nenguyut babpat ineh pekarur.

³⁷ Déi' Tanga' Bued Abpa' ideh numak ican luk macing Bawang Daud, luk lemaba ruma' Daud, idi luk lemubed macing libung ineh déi' Tanga' Abpa', luk pa busat aco bawang Yerusalim ineh.

³⁸ Idi babpat luk kedueh luk nemaré ubur ineh iné' pa kabing maya' luun libung ineh, idi ui nemaya' puetdeh. Kai nelemaba Pudut luk Medita' luk titen Tetel macing Libung Rayeh.

³⁹ Idi rat su ineh kai nelemaba Tanga' Epraim, Tanga' Yesana, Tanga' Lawid, Pudut luk Medita' luk titen Hananel, idi teh Pudut luk Medita' luk titen Ratu macing Tanga' Dumba. Idi kai nenalan macing Tanga' Lun luk Nginita Bawang.

⁴⁰ Idi dueh babpat luk maré ubur kuan Allah nacing su luk inan Ruma' Allah. Sebuang lun rayeh idi denganku.

⁴¹ Idi ini ngadan tuda'-tuda' lun baken luk bang babpatku, ieh ineh imam-imam luk ngiup serupit: Eliakim, Masia, Miniamin, Mikaya, Eliunai, Sekaria, idi Hanania;

⁴² idi teh lun luk menani luk kinuyut Yesrahia: Masia, Semaya, Eliasar, Usi, Yohanan, Malkia, Elam, idi Eser. Idi ideh menani rayeh arod.

⁴³ Idi bang aco sineh teh mula' baré luk biré kuan Tuhan, idi lun mula' mepanu' ku awang, ngaceku Allah luk nengawang niatdeh. Decur idi anak pana' nengerayeh aco sineh, idi ria'deh miak pedingeren rat mado.

Ratnan Maré Kuan Lemulun Luk Ngakem Bang Ruma' Allah

⁴⁴ Kareb ineh ideh nengeletep tuda'-tuda' burur lemulun luk miak ngimet su luk inan nganug padé luk pun piranih, idi bua' luk pun melak, babpat pulu', idi baré luk baken kuan Ruma' Allah. Lemulun ini ngalap baré kuan imam-imam idi lun Liwi maya' kudeng luk icuk bang Ukum Musa, ratnan lati'-lati' luk muneng ku bawang-bawang rayeh. Amung lun Yahuda mawang niat inan imam-imam idi lun Liwi,

⁴⁵ ngaceku ideh nenganau' luk icuk Allah, idi nemaya' luk inatur ratnan ngeligan. Idi teh lun luk menani bang Ruma' Allah idi lun luk nginita Ruma' Allah nenganau' kekamendeh maya' kudeng luk icuk Raca' Daud idi anakneh Selimun.

⁴⁶ Rat mon, ieh ineh rat kareb Raca' Daud idi Asap lun luk mileh menani ineh, lun luk mileh menani pangeh nenguyut nelun mula' menani ubur kuan Allah.

⁴⁷ Idi kareb Serubabel, idi teh kareb Nehemia, amung lun Israil pekalai maré baré anid-anid aco kuan lun luk menani idi teh kuan lun luk nginita Ruma' Allah. Lun mula' nemaré baré luk meligan kuan lun Liwi, idi lun Liwi nemaré aceh babpat luk litep kuan imam-imam.