NEHEMIA 10 - BALA LUK DO'

¹ Luk pun-pun nén, ieh ineh Pengulu Nehemia Hakalia, idi pangeh ineh Sedekia luk nén.

^2-8 Imam-Imam: Seraya, Asaria, Yeremia, Pasur, Amaria, Malkia, Hatus, Sebania, Maluk, Harim, Meremot, Obadia, Daniel, Gineton, Baruk, Mesulam, Abia, Miamin, Masia, Bilgai, idi Semaya.

^9-13 Lun Liwi: Yesua Asania, Binui rat inul Henadad, Kadmil, Sebania, Hodia, Kelita, Pelaya, Hanan, Mika, Rehob, Hasabia, Sakur, Serebia, Sebania, Hodia, Bani, idi Beninu.

^14-27 Lun Rayeh Pupu Israil: Paros, Pahat Moab, Elam, Satu, Bani, Buni, Asgad, Babai, Adonia, Bigbai, Adin, Ater, Hesekia, Asur, Hodia, Hasum, Basai Harip, Anatot, Nebai, Magpias, Mesulam, Hesir, Mesesabel, Saduk, Yadua, Pelatia, Hanan, Anaya, Hosia, Hanania, Hasub, Haloes, Pila, Sobek, Rehum, Hasabna, Masia, Ahia, Hanan, Anan, Maluk, Harim, idi Bana.

Pejani' Ineh

²⁸ Kai, lun Israil, lun imam-imam, lun Liwi, lun luk nginita Ruma' Allah, lun luk menani bang Ruma' Allah, lun luk ngakem bang Ruma' Allah, idi amung lun baken luk maya' Ukum Allah, pangeh nepatad rat nelun pupu baken luk tudo bang bawang kai, idi teh dengan decur kai idi anak kai luk petap rayeh kali' ilungneh,

²⁹ pad-pad dengan lun rayeh-rayeh kai, pebulung pad kai mulun maya' Ukum Allah, luk biréNeh dengan bala demulunNeh Musa; idi kai miak maya' amung —amung luk duken Allah Tuhan kai nekai; idi kai miak ngimet amung-amung Ukum idi bada'Neh. Idi kudeng kai na maya' bulung ini kai miak uen ngediman.

³⁰ Kai na miak ngaweh nelun pupu baken luk tudo bang bawang kai.

³¹ Kudeng ideh nguit padé idi anun-anun luk baken luk pisuen kuan kai kareb Aco luk inan Mudeng idi aco baken luk meligan, idi na kai miak melih rat nedeh. Anid-anid lak luk ketudu' kai na miak nganau' lati', idi kai miak ngagka' amung baleh lun baken.

³² Anid-anid lak kai miak maré aceh balad pirak luk isuut ku ngedengan kekamen Ruma' Allah.

³³ Luk miak barén kai kuan sembayang bang Ruma' Allah, ieh ineh: ruti luk biré, baré luk kenen, aya' ku baré luk sabpen anid-anid aco, baré luk sabpen kareb Aco luk inan Mudeng, idi Irau Bulan Baruh, idi aco rayeh luk baken, idi baré luk baken, idi baré ngaceku sala' lun Israil, idi anun-anun luk baken luk petulu kuan Ruma' Allah.

³⁴ Kai, lun mula', imam, idi lun Liwi miak nala' udi anid-anid lak, pad kai miak kali' inul sapeh luk petulu maré kayuh ku ngeseb baré kuan Tuhan Allah kai maya' kudeng luk inayud bang Surat Ukum.

³⁵ Anid-anid lak kai miak nguit amé' Ruma Allah padé luk piranih atun idi bua' luk pun melak.

³⁶ Kai miak nguit amé' matun imam-imam luk ngakem kuan Allah bang Ruma' Allah anak deléi kai luk atun, idi ideh barén kuan Allah, idi teh anak sapi', anak dumba, idi anak amék kai luk atun barén kuan Allah, maya' kudeng luk inayud bang Surat Ukum.

³⁷ Kai miak nguit amé' matun imam-imam bang Ruma' Allah banak luk pinuar ratnan padé luk pun piranih anid-anid lak, idi amung baré luk baken ratnan abpa' anggur, umau saitun, idi bua' luk baken-baken teh. Kai miak nguit amé' matun lun Liwi luk ngamung babpat pulu' bang bawang kai, babpat pulu' ratnan tibu kai.

³⁸ Idi petulu imam luk inul Arun idi dengan lun Liwi kareb babpat pulu' ineh uen ngamung. Idi lun Liwi miak nganug bang su luk inan nganug binaweh bang Ruma' Allah sebabpat ratnan babpat pulu' luk imung ineh, kuan kekamen bang Ruma' Allah.

³⁹ Lun Israil idi lun Liwi miak nguit baré padé, abpa' anggur, idi umau saitun amé' bang su luk inan nganug repapeh Ruma' Allah, idi su luk inan imam luk uned ngakem, lun luk nginita Ruma' Allah, idi lun luk menani bang Ruma' Allah tudo. Kai na miak ugka' ngasa' Ruma' Allah kai.