NEHEMIA 1 - BALA LUK DO'

¹ Idi ini bala ratnan kekamen Nehemia, anak Hakalia. Kareb ui déi' bawang Susa, ieh ineh bawang rayeh, bang bulan Kisleb bang lak luk kedueh ngepulu',

Nehemia Ngerawé Bawang Yerusalim

² idi Hanani, seburur kinanakku nacing dengan tuda'-tuda' burur lun rat déi' Yahuda. Idi ui nengitun nedeh ratnan lun Yahudi luk neketecan idi luk nepuit ratnan bawang luk inandeh tiban, idi ratnan bawang Yerusalim teh.

³ Idi kebaladeh negku, “Lun luk neketecan bang bawang ineh luk nepuit ratnan bawang luk inandeh tiban ineh, ideh ineh pelaba susa' idi migu'. Idi teh libung luk meraben déi' Yerusalim pangeh tibpa idi amung tanga'neh pana' iseb.”

⁴ Kareb ui neninger bala ini, idi ui netudo idi nenangi'. Idi ui netemido tuda'-tuda' aco. Idi ui mawa' na kuman idi nesembayang pa kiung Allah Surga,

⁵ kesembayangku, “O Tuhan Allah Surga, Allah luk meluun rayeh idi luk inan matot! Iko lutep maya' jani' idi mawa nelun luk mawa Namu, idi luk maya' amung ukumMu.

⁶ Do' iko ngaten lalid idi matehMu, idi ninger sembayang demulunMu, luk sembayang pa kiungMu tebaco kedangan idi mutuh kuan demulunMu, lun pupu Israil, pad kai ngamo sala' kai Namu. Ngaceku amung uang tetek ruma' tepun kai pangeh menganau' sala'.

⁷ Kai mesala' pa kiungMu, ngaceku kai na nemaya' ukum, bada', idi dalan luk biréMu ini Musa, demulunMu ineh.

⁸ Ngerawé bala luk biréMu ni Musa, ‘Kudeng muyuh lun Israil na lutep maya' Negku, Ui miak ngatad nemuyuh amé' arang pupu baken.

⁹ Iamo' kudeng muyuh lumi Negku idi maya' amung ukumKu, Ui miak ngamung nemuyuh luk pangeh pitad macing iring tana', idi nguit nemuyuh muli' amé' inan bawang luk pinili'Ku mangun ku su luk inan lemulun sembayang Negku.’

¹⁰ “O Tuhan ideh ineh demulunMu idi pupuMu, luk pangeh inuli'Mu ku laludMu luk rayeh idi ticu'Mu luk metueh.

¹¹ O Tuhan, ninger sembayangku, idi sembayang amung demulunMu luk matot ku ngadanMu. Idi maré peruan negku bang aco sini, idi ngegio niat raca' pad ieh méi' negku.”