NANI UBUR 7 - BALA LUK DO'

Sembayang Mutuh Allah Mutut Ukum Luk Matu

¹ O Tuhan, Allahku, ui pangeh initaMu; ngulun negku, idi muit negku ratnan amung lemulun luk ngerada' negku,

² idi naban negku mepad kudeng balang, idi ngeramit negku, pad seburur pana' na miak ngulun negku.

³ O Tuhan, Allahku, kudeng ui pangeh nenganau' kudeng ini: kudeng ui pangeh nengesala' nelun,

⁴ kudeng ui pangeh nemasui lun rurumku, idi nengurat bunu'ku dengan na punneh,

⁵ nima' bunu'ku ngerada' negku idi ngakem negku, pad ui dedaten idi pitayendeh, idi butungku tacindeh luun tana'!

⁶ Tumui, Tuhan, dengan, usehMu, idi nala' gateh bunu'ku! Tumui idi ngedengan negku; ngaceku Iko pian ku luk matu.

⁷ Ngamung amung-amung pupu libutMu, idi ngimet nedeh rat déi' dita'.

⁸ Tuhan luk mutut besara' amung lemulun. Mutut besara'ku, Tuhan, pad ui ruen matu; Iko kali' negku na mesala'.

⁹ Ngagka' kekamen lemulun luk dat, idi ngeperuan lemulun luk matu. Ngaceku Iko Allah luk matu, Iko ngukum terawé idi pian lemulun.

¹⁰ Allah, Ieh ineh libungku, idi Ieh ngulun lemulun luk maya' Neneh.

¹¹ Allah, Ieh ineh lun mutut besara' luk matu, luk megéi' ngukum lemulun luk dat.

¹² Kudeng lemulun na uren, Allah miak ngir pelapetNeh. Idi Ieh temina' ku gamanNeh;

¹³ Ieh temina' ku repapeh pebunu', idi ilebNeh luk mepad kudeng apui.

¹⁴ Siruh kudeng apeh terawé lemulun luk dat; ieh sikal nganau' susa' idi naluk teh.

¹⁵ Ieh ngukat aceh lubang luk medalem, idi ieh sebuleng makab bang ineh!

¹⁶ Datneh sebuleng teh luk ngukum neneh. Ieh murat ku kekamenneh luk dat ineh.

¹⁷ Ui ngubur Tuhan ngaceku SiriNeh. Ui menani ngubur Tuhan luk Meluun Dita'.