NANI UBUR 2 - BALA LUK DO'

Raca' Allah Luk Pinili'

¹ Ngudehké lun pupu baken sikal metueh? Ngudehké lemulun ineh ngerawé dalan luk na ulek?

² Amung raca'deh sikal metueh, idi amung lun luk ngimet nedeh pamung sikal metueh ratnan Tuhan idi raca'Neh luk pinili'.

³ Kebaladeh, “Do' tau mepuit ratnan imetdeh, idi nala' abetdeh.”

⁴ Tuhan meriruh ratnan KerusiNeh déi' surga, idi situnga nedeh.

⁵ Dengan useh Ieh pebala nedeh. Dengan gateh Ieh ngatot nedeh.

⁶ KebalaNeh, “Ui pangeh nengeletep raca'Ku luun Sion, pegkungKu luk meligan.”

⁷ Kebala raca', “Ui maré kali' luk bila Tuhan. Kebala Tuhan negku: ‘Iko anakKu. Aco sini Ui mangun ku TamanMu.

⁸ Mutuh, idi Ui miak maré amung pupu kuanMu; amung tana' miak kuanMu muci.

⁹ Iko miak ngimet nedeh dengan ticu' belawan, idi mila' nedeh mepad kudeng kuden.’ ”

¹⁰ Nekini ninger do'-do', O muyuh luk raca', matar do'-do', amung muyuh luk ngimet!

¹¹ Maya' Tuhan dengan matot idi megegker.

¹² Ngebeneh burur muyuh pa kiungNeh; kudeng na, kali' rungen Ieh museh, idi muyuh maté, ngaceku Ieh malé useh. Samal kuan amung lemulun luk amé' sigapung Neneh.