NANI UBUR 1 - BALA LUK DO'

SURAT LUK PUN-PUN (Nani Ubur 1—41 ) Awang luk Matu

¹ Samal kuan lemulun luk ara' ku bada' lemulun luk dat, luk na maya' ayu lemulun luk mesala', idi na perurum dengan lemulun luk situnga nan Allah.

² Iamo' ieh mawang niat maca' ukum Tuhan, idi ngerawé neneh tebaco kedangan.

³ Ieh mepad kudeng aceh kayuh luk mulun tangeb abpa', luk megéi' kebua' anid kareb, idi donneh pana' na melayuh. Amung luk ruenneh inan ulek.

⁴ Iamo' lemulun luk dat na tu-tu kudeng ineh! Ideh mepad kudeng lipang luk mepalid ku bui.

⁵ Lemulun luk dat miak kumin Allah. Idi lemulun luk mesala' miak uen ngatad ratnan lemulun luk matu.

⁶ Tuhan miak matar lemulun luk matu. Iamo' lemulun luk dat miak maté ruked-ruked.