NANI SELIMUN 8 - BALA LUK DO'

¹ Kudeng iko kinanakku luk matu, luk neniti' tinanku, idi kareb ui papu' namu arang dalan, ui miak ngangep namu, idi seburu pana' nateh miak ngilang.

² Ui miak nguit namu amé' ruma' tinanku, idi maré abpa' bua' delima luk do' rupenmu.

³ Ticu'neh pa kabing ku lagaku, idi ticu'neh pa tinueh ngapel negku.

⁴ O decur Yerusalim, do' muyuh pejani' negku, pad muyuh na ngesabeng awa kai dueh.

Nani Luk Keanem Decur Baken

⁵ Idé' ineh luk macing rat déi' su luk ali-ali, luk pimet ticu' dengan waneh? Iang buyo ui nengalat namu, su luk inanmu tinganak.

Aceh Decur

⁶ Aleg mawa idi ngalap nelun baken. Ngaceku tueh awa mepad kudeng até, idi useh temaruh mepad kudeng tanem, idi mebudung kudeng apui.

⁷ Abpa' na miak ngilep neneh, idi ereb na miak nganud neneh. Iamo' kudeng seburur lemulun pian melih awa ku binawehneh, ieh miak ngalap kuyo.

Kinanak-Kinanak Deléi Decur Ineh

⁸ Kai inan kinanak decur luk isuut, idi iti'neh isuut. Anun luk miak ruen kai kuanneh, kareb inan lun ngitun neneh?

⁹ Kudeng ieh alad, kai miak mudut aceh luk inan matar luunneh ku pirak. Kudeng ieh tanga', kai miak ngalad neneh ku bangar tumuh.

Aceh Decur

¹⁰ Ui ini alad, idi iti'ku ruma' luk medita'. Awaku miak kali' dengan megala', idi ui ini pinatar do'-do'.

Awaneh

¹¹ Selimun inan kabun anggur, déi' bawang Baal Hamon. Ieh nemili' lun luk mileh miak ngasa' kabun ineh, idi ideh miak ngacam kabun ineh, meribu balad pirak seburur.

¹² Ui sebuleng teh inan kabun anggur, Selimun, iko miak ngalap meribu balad pirakmu, idi lun luk mileh ngasa' kabun ineh, miak ngalap dueh ngeratu balad pirak ku babpatdeh.

¹³ O awaku, luk tudo bang kabunku, anunké luk pedingeren lun rurumku? Nima' negku ninger uni tangmu teh.

Aceh decur

¹⁴ O awaku amé' negku mepad kudeng talau, idi anak payo luk luun pegkung, su luk inan uduh luk do' buen.