NANI SELIMUN 7 - BALA LUK DO'

¹ Pelaba do' kukudmu makai selipar, O decur luk metaga. Ayu tipenmu pelaba do', mepad kudeng luk inau' lun luk mileh ngarit.

² Puedmu mepad kudeng sangkir, luk megéi' ruan abpa'. Awa'mu mepad kudeng aceh runguh padé, luk arang bunga' ukit.

³ Iti'mu mepad kudeng payo luk anak rapid, idi kudeng dueh talau.

⁴ Diermu mepad kudeng ruma' luk medita' luk mebuda'. Matehmu mepad kudeng takung luk bang bawang Hesbon, luk muneng ku tanga' bawang luk rayeh ineh. Icungmu do' taga mepad kudeng ruma' luk medita déi' Lebanon, luk inan lun tudo matar bawang Damsik.

⁵ Uluhmu mepad kudeng Pegkung Karmel. Abpukmu luk ipid mepad do' kudeng kibung luk sia' merirem; idi raca' miak metayan ku do'neh.

⁶ O awaku, pelaba do' tagamu, idi ui pelaba awang niat namu.

⁷ Ayumu mepad do' kudeng lawa kurma, idi iti'mu kudeng bua'neh.

⁸ Ui miak manad ineh, idi ngalap bua'neh. Iti'mu mepad kudeng bua' anggur sirenku, idi riebmu mepad kudeng bua' luk do' buen,

⁹ idi tangmu mepad kudeng abpa' anggur luk do'. Nima' abpa' anggur ineh manud amé' inan bibir idi lipen awaku.

Aceh Decur

¹⁰ Awaku kuan negku, idi ieh pian ngalap negku.

¹¹ O awaku do' kiteh amé' déi' lati', idi rudap sealem déi',

¹² pad kiteh miak tumui muka idi nier anggur, kudeng ieh nenginulih, idi kudeng busakneh nelusad, idi nier delima kudeng ieh kebusak teh. Su ineh ui mada' awaku namu.

¹³ Idi inan buen pelamai idi amung bua' luk do' munung tanga' kiteh. O awaku, ui nenganug kuanmu, bua' luk mon idi luk mebaruh.