NANI SELIMUN 5 - BALA LUK DO'

Awaneh

¹ O awa luk awanku, ui pangeh iné' bang kabunku. Ui ngamung murku idi kayuh luk do' buen; ui kuman duru' tebikan, idi ngirup abpa' anggur idi rata sapi'. Do' medueh kuman idi ngirup pad macing medueh mabuk ku awa!

Decur Baken Nani Luk Keapat Aceh Decur

² Karebku rudap, lalidku kulat, idi ui neninger awaku nateg tanga'. Nima' negku semuet, O awaku, idi sukurku luk pelaba do'. Uluhku neba' ku ipup idi ku udan puré.

Awaneh Aceh decur

³ Napeh teh, nganau' kuyu' ui atun, idi teh ui pangeh nemaru' kukudku, ara' ui meburi baruh teh.

⁴ Awaku nengakem pasek tanga' kidi, idi niat ku nesigio.

⁵ Idi ui pian awaku semuet. Idi bang paladku inan mur, idi luun bua' ticu'ku teh, kareb ui nengakem pasek tanga' ineh.

⁶ Idi ui nengukab tanga' kuan awaku, iamo' ieh pangeh neburo. Ui pelaba geregan ninger uni tangneh! Ui nenakap neneh, iamo' na ieh kali'ku; idi ui nenawar neneh, nateh ieh idi.

⁷ Ideh luk matar bawang ineh nekali' negku, idi ideh nenecat negku, idi nengalap kuyu' kidi.

⁸ O decur Yerusalim, do' muyuh pejani' negku, kudeng muyuh kali' awaku, do' mala neneh, ui melaya' ngaceku pelaba awa.

Decur Baken

⁹ O decur luk pelaba taga, do' mada' nekai kudeng apeh ayu awa midi. Anunké do'neh awa midi, pad kai pejani' namu?

Aceh decur

¹⁰ Awaku pelaba taga idi metueh, ieh sebuleng luk pelaba taga arang pulu' ngeribu lemulun.

¹¹ Abpukneh mekadang idi megeriwet, idi mitem kudeng bungkak, idi uluhneh mepad kudeng amas luk meluun do'.

¹² Matehneh mepad kudeng sukur luk tuped tangeb abpa', luk biru' ku rata sapi'.

¹³ Pingitneh mepad kudeng kabun busak luk do' buen. Bibirneh mepad kudeng bunga' ukit, luk pelaba do' buen.

¹⁴ Langenneh pelaba do' ayu, idi ieh inan susing luk meraga. Bururneh do' salud idi mebuda'.

¹⁵ Tipenneh mepad kudeng diri batu luk mebuda', luk ilen ku amas. Ayuneh mepad kudeng Pegkung Lebanon, idi tumuhneh luk pelaba do'.

¹⁶ Balaneh pelaba do' én, idi ayu bururneh ngawang niatku. Kudeng ineh ayu awa kidi, O decur Yerusalim.