NANI SELIMUN 4 - BALA LUK DO'

Awaneh

¹ O awaku, pelaba do' tagamu! Idi matehmu pana' pelaba do' teh, pa keted ebpu uluhmu. Abpukmu melapi mepad kudeng buluh amék luk remuru pegkung Giliad.

² Lipenmu mebuda' mepad kudeng dumba luk binuting idi luk pangeh biru'. Sebuleng pana' nateh nerukep; amung-amungdeh mepad mo'.

³ Bibirmu mepad kudeng gitian luk mesidak; idi balamu pelaba do' pedingeren, idi pingitmu pana' pelaba do' sia'.

⁴ Diermu mesalud kudeng ruma' Daud luk medita'. Bané luk i diermu mepad kudeng utap meribu lun pebunu' luk mebala.

⁵ Iti'mu mepad kudeng dueh talau luk anak rapid, luk nakap luk kenen arang bunga' ukit.

⁶ Ui miak tudo luun pegkung mur, ieh ineh pegkung umau luk do' buen. pad macing aco masat.

⁷ O awaku, pelaba do' tagamu, idi luunmu na tupu pilat.

⁸ O awanku amé' maya' negku, rat Pegkung Lebanon. Idi remuru rat Pegkung Amana, rat Pegkung Senir idi Pegkung Hermon. su luk inan balang idi kuir tudo.

⁹ O awa luk awanku, kareb ui nier matehmu idi banému, niatku nepekisu'.

¹⁰ O awa luk awanku, pelaba do' mawa namu, idi awamu meluun paci' ratnan abpa' anggur. Idi buenmu meluun do' ratnan buen luk baken.

¹¹ O awaku, bibirmu mepad én kudeng duru' tebikan; idi dila'mu mepad én kudeng rata idi duru' tebikan teh. Kuyu'mu do' buen, mepad kudeng Pegkung Lebanon.

¹² Awa luk awanku ineh mepad kudeng aceh kabun luk melinged idi luk linibung, idi kudeng aceh bued luk na melagan.

¹³ Amung luk tibuen do' ulun su ineh. Idi ideh temubu' mepad kudeng kabung bua' delima, idi ngeruat bua' luk pelaba do', idi inan teh geregka' idi uduh luk do' buen;

¹⁴ uduh luk do' buen, sigumau, idi kayuh luk mepaci', idi amung kayuh luk do' buen rabpunneh, mur idi tara ala, dengan amung luk meluun do' buen.

¹⁵ Bued idi arur luk uput rat Pegkung Lebanon, mubpur kabun ineh.

Aceh Decur

¹⁶ O bui rat pa tinueh busat aco idi rat pa kabing busat aco, do' tumui idi mebui bang kabunku, idi nguit buen luk do'. Nima' awaku amé' bang kabunneh, idi kuman bua' luk meluun do'.