NANI SELIMUN 3 - BALA LUK DO'

¹ Kareb ui rudap anid-anid aco, Ui nenginupi aceh deléi luk inanku mawa; ui nenakap neneh, iamo' na ieh kali'ku.

² Petacu ui netumui idi nenalan maya' dalan luk rayeh idi luk isuut bang bawang ineh. Ui iné nakap deléi luk inanku mawa, iamo'na ieh kali'ku.

³ Lun luk matar bawang ineh nepapu'ku, idi ui nengitun nedeh, “Kali' muyuh awa kidi?”

⁴ Kareb ui nelemaba nedeh, petacu ui nekali' awa kidi. Ui nengapel neneh idi ngibpang neneh buro, pad macing ui nenguit neneh amé' ruma' tinanku, idi semuet bang takepneh.

⁵ O decur Yerusalim, do' muyuh pejani' negku, idi pebulung ku payo idi talau luk mawer, pad muyuh na ngesabeng awa kai dueh.

Nani Luk Keteluh Aceh Decur

⁶ Anun luk rat déi' su luk ali-ali ineh, luk kudeng rabpun mur idi umau luk do' buen luk iseb, idi kudeng umau luk do' buen luk pisuen lemulun luk iné' pepua'

⁷ Siruh, ideh nguit pagau luk kuan Selimun, ieh ineh anem ngepulu' burur lun luk mesangit rat bawang Israil.

⁸ Amung-amungdeh mileh makai pelapet, idi pekalai pebunu'. Anid-anid bururdeh inan pelapet, pad matar bunu' luk macing medacem.

⁹ Raca' Selimun binirirdeh luun pagauneh, luk inau' ratnan kayuh luk do'.

¹⁰ Kayuh luk anid lidung pagau ineh, luk inan ngabet aponeh, ibpu ku pirak. Idi aponeh kibung luk inan amas. Idi ebpu laganeh kibung luk sia' merirem luk inau' decur Yerusalim luk mawa inan raca'.

¹¹ O decur Sion, amé nier Raca' Selimun. Idi pataneh inau' tinanneh, kareb ieh nengaweh, idi aco ineh luk inanneh pelaba awang niat.