NANI SELIMUN 2 - BALA LUK DO'

¹ Ui ini busak tunung luk bang pulung déi' Saron, idi busak ukit luk luun pegkung.

Awaneh

² Awaku mepad kudeng ukit arang tabpa', idi arang amung decur baken.

Aceh Decur

³ Mepad kudeng kayuh luk inan bua' arang kayuh luk bang pulung, kudeng ineh teh awaku arang deléi baken. Ui pian tudo iang lungungneh idi bua'neh pelaba do' én kenenku.

⁴ Ieh nenguit negku iné' su luk inan kuman, idi ieh nengiding bedéra awa pa luunku.

⁵ Ngetueh negku ku bua' anggur idi ngedo' negku ku bua' luk bang pulung! Ui melaya' ngaceku pelaba awa.

⁶ Ticu'neh pa kabing ku lagaku, idi ticu'neh pa tinueh ngapel negku.

⁷ O decur Yerusalim, do' muyuh pejani' negku idi pebulung ku payo idi talau luk mawer, pad muyuh na ngesabeng awa kai dueh.

Nani Luk Kedueh Aceh Decur

⁸ Ui ninger uni tang awaku. Ieh upun maya' luun pegkung amé' papu' negku.

⁹ Awaku mepad kudeng talau, idi kudeng anak poyo deléi. Siruh, ieh tuped libal alad kiteh, idi nier negku rat bang tabuk.

¹⁰ Awaku pebala negku. O awaku, amé' tungé' maya' negku.

Awaneh

¹¹ Kareb meteneb pangeh nepelaba; idi udan pangeh nato teh;

¹² idi amung-amung kayuh pana' kebusak teh. Ini aceh kareb miak menani; idi uni sukur pana' pedingeren déi' lati'.

¹³ Bua' gita' pana' malé teh melak, idi buen busak anggur pana' pelaba teh do'. O awaku, amé' maya' negku.

¹⁴ Iko sigapung mepad kudeng sukur bang lubang batu. Nima' negku nier kiungmu luk metaga, idi ninger uni tangmu.

¹⁵ Do' ngakem amung dawa' labo, idi luk isuut pana', kareb nateh ideh kuman busak anggur ineh.

Aceh decur

¹⁶ Awaku ui kuan, idi ieh kuan negku. Ieh maman dumbaneh arang bunga' ukit.

¹⁷ Kareb meteneb idi nateh mét idang. Lemubed, O awaku, mepad kudeng talau, idi kudeng anak payo deléi luk luun pegkung.