NANI SELIMUN 1 - BALA LUK DO'

¹ Nani Selimun luk pelaba do'.

Nani Luk Pun-Pun Aceh decur

² Iko ngangep negku; idi awamu meluun paci' ratnan abpa' anggur.

³ Iko pelaba do buen; idi ngadanmu mepad kudeng umau luk do' buen. Seburur decur pana' nateh na mawa namu.

⁴ Ngalap negku idi kiteh buro; nguit negku amé' bang takepmu idi iko mangun ku raca'ku. Kiteh miak mawang niat ngaceku iko idi. Do' kiteh ngerawé awa kiteh meluun ratna abpa' anggur, idi iko petulu inan mawa!

⁵ Et idang nengitem negku, iamo' ui do' taga. O decur Yerusalim, ui mitem mepad kudeng lepo kibung luk déi' Kedar, ui mepad kudeng dicing luk bang ruma' Raca' Selimun.

⁶ Aleg ngerawé negku dat ku ui mitem, ngaceku ét idang luk nengitem negku. Kinanak-kinanakku luk deléi museh negku, idi ideh nengecuk negku ngakem bang kabun anggur, pad na inan karebku ngerawé bururku sebuleng.

⁷ Mada' negku, O awaku, su luk inanmu nguit dumbamu, idi su luk inandeh peringucung kareb muned aco. Ngudehké ui nakap namu arang sengeriudan dumba lun baken?

Awaneh

⁸ Naké iko kali' su ineh, O decur luk pelaba do' taga'? Do' amé' maya' dumba ineh, idi nakap uduh kuan amékmu muneng ku lepo kibung lun luk matar dumba ineh.

⁹ O awaku, iko mepad kudeng kuda tineh luk arang kuda luk nguit keréta raca' Masir.

¹⁰ Abpukmu luk ipid pelaba do' taga pekop pingitmu, idi diermu inan baé luk meraga.

¹¹ Kai miak nganau' ratai amas kuanmu, dengan bané pirak.

Aceh decur

¹² Kareb raca'ku netelubid luun bitaranneh, idi umauku pelaba do' buen kali'neh.

¹³ Awaku mebuen mepad kudeng mur kareb ui ngabin neneh.

¹⁴ Awaku mepad kudeng busak luk mulun mo'-mo' bang kabun anggur déi' Enggedi.

Awaneh

¹⁵ O awaku, pelaba do' tagamu! Idi matehmu pana' pelaba do' teh.

Aceh Decur

¹⁶ O awaku, iko teh pelaba taga, idi luk inanku mawang niat. Uduh miak mangun ku bitaran kiteh;

¹⁷ idi tumuh miak ku petuked ruma' kiteh, idi aru' miak ku aponeh.