NAHUM 2 - BALA LUK DO'

Tabpa Bawang Ninewé

¹ O Ninewé, iko uen ngerieng! Lalud luk miak mila' namu pangeh nacing. Matar amung libung luk meraben! Ngabang dalan! Do' iko temina' pebunu'!

² (Tuhan malé ngelubed ubur Israil, pelé ieh mepad kudeng luk atun kareb nateh bunu' nengaro bawang ineh.)

³ Lun pebunu' luk ngerieng namu ngimet utap luk mesia', idi ngayung ku luk mesia' teh. Ideh netemina' pebunu'! Kerétadeh mekilat mepad kudeng apui! Idi kudadeh pana' geregan nalan!

⁴ Kerétadeh nalan peliwa-peliwa, luun dalan idi luun natad pana'. Ideh mekilat mepad kudeng sesakan, idi awerdeh mepad kudeng kilep.

⁵ Lun rayeh pebunu' pangeh titeng; pad ideh ngimet bawehdeh. Lun luk ngerieng upun amé' matun libung idi nganau' luk ku ngerieng bawang ineh.

⁶ Amung tanga' abpa' mukab, pad ruma' raca' mepanu' ku tot.

⁷ Raca' decur tibandeh, idi demulunneh nangi'; ideh mepag ruukdeh ku dat niatdeh.

⁸ Mepad kudeng abpa' rat bang leleng, lun buro rat Ninewé! “Ugka'-Ugka'!” kebala lun baken. Iamo' seburur pana' nateh luk lemubed.

⁹ Ngaro pirak idi amas! Bawang ini mepanu' ku binaweh!

¹⁰ Ninewé inusag, tican, idi dat ali! Niatdeh sigio ku totdeh; idi teh alebdeh megegker. Kiungdeh mebudi idi ideh melaya' peh.

¹¹ Iapehké lubang balang ineh nekini, ieh ineh su luk inan anak balang isa' tinandeh, idi su luk inan balang deléi sigapung dengan anakneh ineh; pad ideh na inan susa'?

¹² Balang ineh nengaté pung luk tikapneh, idi nemaré babpat kuan tineh idi anakneh; idi nemanu' lubangneh ku uang luk ketecan.

¹³ “Ui ini bunu'mu,” kebala Tuhan luk Melalud. “Ui miak ngeseb amung kerétamu. Amung anak balangmu ineh miak maté bang bunu', idi Ui miak ngalap amung-amung binaweh luk pinomu rat nelun baken. Idi arodmu pana' nateh pedingeren bang tana' ini.”