NAHUM 1 - BALA LUK DO'

Useh Tuhan Déi' Ninewé

¹ Ini bala ratnan Ninewé, ieh ineh surat ratnan luk sinier Nahum, lun luk rat Elkos.

Tuhan Museh Nan Ninewé

² Tuhan Allah temaruh; Ieh ngukum nelun luk sikal metueh rat Neneh, idi Ieh ngua' nedeh dengan useh.

³ Tuhan na malé museh; iamo' Ieh melalud, idi na miak na Ieh ngukum nelun luk mesala' Su luk dalan Tuhan inan barui. Laput ineh abuh ratnan kukudNeh!

⁴ Ieh mebpeng abpa' rayeh, pad ieh mekeket, idi arur-arur pana' ruenNeh mekeket. Laman luk déi' Basan melayuh, idi Pegkung Karmel tekering, idi busak luun Pegkung Lebanon mekarang.

⁵ Amung pegkung meruyuh pa kiung Tuhan; idi surud pana' sigio. Tana' ini pana' meruyuh kareb Tuhan silagan; idi amung lemulun pana' megegker.

⁶ Kareb Tuhan museh, idéké luk miak tuman ku usehNeh? Ieh ngutang usehNeh luk mebudung; batu-batu pana' mekareg amé' ku abuh pa kiungNeh.

⁷ Tuhan ineh do'; Ieh nengelibung pupuNeh kareb inan susa'; idi Ieh matar lemulun luk lumi Neneh.

⁸ Mepad kudeng ereb luk rayeh, Ieh ngusag amung-amung luk sikal metueh rat Neneh. Ieh ngerada' amung bunu'Neh, pad ideh mabud maté.

⁹ Ngudehké muyuh pegayam sikal metueh ratnan Tuhan? Ieh miak ngaté nemuyuh. Na seburur miak nutun Tuhan, meluun ratnan sekua'.

¹⁰ Mepad kudeng tabpa' luk mepamung idi geramih luk tekering muyuh miak sabpen!

¹¹ Rat namu, O Ninewé, nacing seburur lemulun luk megéi' ngerawé luk dat, idi luk sikal metueh ratnan Tuhan, ieh ineh aceh lun duken Belial.

¹² Ini luk belén Tuhan kuan pupuNeh, “Sagan pana' lun Asur mula' idi metueh, bawehdeh miak uen ngusag pad ideh na idi peh. O pupuKu, muyuh nedereh inau'Ku, iamo' na Ui pian nganau' kudeng ineh sekua' teh.

¹³ Nekini Ui ngagka' lalud Asur pa luun muyuh, idi Ui neka kaling muyuh.”

¹⁴ Ini luk bila Tuhan ratnan lun Asur: “Na lun ngerawé nedeh peh. Ui miak ngusag amung akang luk bang ruma' allahdeh. Ui nganau' aceh lengutan kuan lun Asur, ngaceku na ideh petulu mulun bang tana' ini.”

¹⁵ Siruh, seburur lun duken macing maya' pegkung, luk nated bala luk do'! Ieh nalan pad ieh mada' ratnan tueh luk macing nemuyuh. O lun Yahuda, ngerayeh aco muyuh, idi maré kuan Allah luk pijani' muyuh. Lemulun luk dat na miak ngerieng bawang muyuh teh. Ideh pangeh inusag!