MIKA 5 - BALA LUK DO'

¹ O lun Yerusalim, do' muyuh sigapung bal alad bawang muyuh, ngaceku bunu' ngerieng nemuyuh. Ideh munu' lun rayeh luk ngimet nelun Israil!

Allah Pejani' Maré Aceh Lun Rayeh Rat Baitlahim

² “O Baitlahim Eprata, iko aceh bawang luk meluun isuut déi' Yahuda. Iamo' Ui nguit aceh Raca' rat namu kuan lun Israil, luk inul tetek ruma'deh rat mon.”

³ Idi Tuhan miak maré pupuNeh bang palad bunu'deh, pad decur luk petulu nenganak ineh nenganak aceh anak deléi. Pangeh ineh pupuNeh luk pangeh tiban ineh miak uen ngelubed kuan pupudeh sebuleng.

⁴ Kareb Ieh macing Ieh miak ngimet pupuNeh dengan tueh luk ratnan Tuhan, idi dengan ubur Tuhan Allah sebuleng. PupuNeh miak tudo dengan do', iamo' lemulun luk aput-aput tana' miak ngamo rayehNeh,

⁵ idi Ieh luk ngacing pedo'. Kareb lun Asur ngerieng bawang tau idi ngusag libung tau luk meraben, tau miak ngecuk nelun rayeh-rayeh tau luk meluun tueh amé' munu' nedeh.

Ratnan Puit Idi Ukum

⁶ Idi ku pelapetdeh ideh ngelaya' bawang Asur. Ideh luk muit netau rat nelun Asur, kareb ideh ngerieng bawang tau.

⁷ Pupu Israil luk ketecan mepad kudeng ipup luk barén Tuhan kuan anid-anid pupu, idi mepad kudeng udan puré luk mebpeh luun tibu luk mulun. Ideh merapet inan Allah, baken inan lemulun.

⁸ Sebuang lun Israil miak tacin arang pupu-pupu mepad kudeng aceh balang luk nakap akan bang pulung idi bang laman. Ieh semuet arang dumba idi ieh upun matun nedeh, idi ngeramit nedeh pad ideh maté, idi na ideh miak uen ngulun.

⁹ Israil miak ngelaya' bunu'neh, idi ngaté amung-amungdeh.

¹⁰ Kebala Tuhan, “Kareb ineh Ui miak ngalap kuda muyuh idi ngusag keréta muyuh.

¹¹ Ui miak ngusag amung bawang muyuh luk rayeh, idi amung libung muyuh luk meraben.

¹² Ui miak nala' amung gimet muyuh, idi ngaté amung lun luk mileh nier.

¹³ Ui miak ngusag amung akang idi ulung luk inan muyuh sembayang. Muyuh na miak sembayang inan luk pangeh inau' muyuh teh.

¹⁴ Ui miak ngusag amung ulung bang bawang muyuh dengan amung bawang muyuh luk rayeh.

¹⁵ Idi dengan usehKu Ui miak ngua' kuan amung pupu luk na maya' balaKu.”