MIKA 4 - BALA LUK DO'

Muci Aco Tuhan Ngimet Luk Amung-Amung Dengan Do'

¹ Muci aco pegkung su luk inan Ruma' Allah meluun dita' ratnan luk amung-amung. Idi mula' pupu miak amé' su ineh,

² kebaladeh, “Do' tau mudik pegkung Tuhan idi amé' Ruma' Allah lun Israil. Tau miak sibada' ratnan luk pian ruen tau; idi tau miak maya' dalan luk pinili'Neh.” Bada' Tuhan macing rat Yerusalim; rat Sion Ieh pebala inan pupuNeh.”

³ Ieh miak mutut gayam arang amung pupu, idi mangun ku lun luk mutut besara' arang amung-amung imet luk rayeh, ieh ineh luk mado rat Israil. Idi nuno pelapetdeh ruen ku radu, idi busudeh ruen ku beluing. Amung pupu na amé' pebunu', idi na sibada' ratnan pebunu' teh.

⁴ Amung lemulun miak tudo dengan do' muneng ku anggur idi gita'deh, idi seburur pana' nateh luk miak ngatot nedeh. Tuhan luk Melalud pangeh nepejani' ratnan amung ineh.

⁵ Anid-anid pupu sembayang idi maya' allahdeh sebuleng, iamo' tau sembayang idi maya' Tuhan Allah tau macing ruked-ruked.

Lun Israil Lemubed Ratnan Bawang Su Luk Inandeh Tiban

⁶ Kebala Tuhan, “Karebneh malé macing, idi Ui miak ngamung pupuKu luk medereh ngaceku tiban, ieh ineh lemulun luk inukumKu atun.

⁷ Ideh mekio' idi mado ratnan bawangdeh, iamo' Tuhan pian ngeperuan nedeh sekua' baruh teh, pad ideh mangun ku aceh pupu luk rayeh.”

⁸ Idi iko, O Yerusalim, Pegkung Batu su luk inan Allah matar pupuNeh, iko miak mangun ku bawang rayeh bang imetmu sekua' teh.

⁹ Ngudeh iko ngitang-ngitang? Ngudeh iko mét mepad kudeng decur luk nenganak? Naké raca' muyuh? Naké lun rayeh muyuh ketecan?

¹⁰ O pupu Yerusalim, ngarod ku ét muyuh mepad kudeng decur luk nenganak. Na miak na muyuh necan bawang rayeh, idi tudo bang bawang luk isuut. Idi na miak na muyuh amé' Babil. Iamo' muyuh miak puatin déi' idi Tuhan miak ngulun nemuyuh ratnan bunu' muyuh.

¹¹ Mula' pupu nepamung pian munu' nemuyuh. Kebaladeh, “Do' Yerusalim uen ngusag! Kai miak kali' bawang ini musag!”

¹² Iamo' pupu ini na kali' luk teruayen Tuhan. Idi teh ideh na kali' Tuhan pian ngamung nedeh idi ngukum nedeh, mepad kudeng padé uen ngerenik.

¹³ Kebala Tuhan, “O pupu Yerusalim, do' amé' ngukum bunu' muyuh! Ui miak ngetueh nemuyuh mepad kudeng sapi' luk unga belawan, idi dapar tekaling. Muyuh miak ngerenik mula' pupu, pad binawehdeh lapenKu, pelé amung ineh mangun ku binaweh Tuhan luk kuan aput tana'.”