MIKA 3 - BALA LUK DO'

Mika Ngadu' Lun Rayeh Lun Israil

¹ O muyuh luk lun rayeh lun Israil! Petulu muyuh pian ku ukum luk mesiri,

² iamo' muyuh megateh inan luk do' idi mawa inan luk dat. Muyuh nganit kubil pupu ini kareb ideh mulun, idi ngalap uangdeh ratnan tulangdeh.

³ Muyuh nganit kubildeh, mutul tulangdeh, idi mulu' uangdeh mepad kudeng uang pung luk uen nanek, idi kenen muyuh.

⁴ Karebneh macing, muyuh miak ngitang pa kiung Tuhan, iamo' na Ieh ngor bala muyuh. Idi teh na Ieh ninger sembayang muyuh, ngaceku muyuh nenganau' luk dat.

⁵ Pupu ini sinaluk nabi-nabi luk pejani' ngacing luk do' kuan lemulun luk mayar tabpardeh, iamo' ngacing bunu' kuan lemulun luk na mayar nedeh. Kebala Tuhan kuan nabi-nabi ini,

⁶ “Ngaceku muyuh ngeraruh pupuKu, idi muyuh na miak nier luk siren teh, idi teh muyuh na miak mada' ratnan luk mangun muci. O nabi-nabi, tarek muyuh lélé macing. Idi aco mangun medacem kuan muyuh kidi-kidi.”

⁷ Lemulun luk mada' ratnan luk mangun muci miak migu' ngaceku ideh sala' bada'. Amung-amungdeh miak dat niat, ngaceku Allah na miak ngor baladeh maya' luk piandeh.

⁸ Iamo' ui ini Mika ruen Roh Tuhan manu' ku lalud, ukum luk mesiri, idi kuu', pad ui mada' nelun Israil ratnan amung-amung sala'deh.

⁹ Ninger balaku, O muyuh lun rayeh lun Israil, luk megateh inan ukum luk mesiri idi ngisu' luk matu mangun ku balih.

¹⁰ Muyuh mudut bawang Allah, ieh ineh Yerusalim luun alen até idi ukum luk na mesiri.

¹¹ Lun rayeh-rayeh luk ngimet bawang ngalap suap, imam-imam luk ngelio ukum Tuhan ngalap tabpar, idi nabi-nabi pana' luk mada' luk sirendeh ngalap usin ku ineh. Idi kebaladeh, Tuhan idi dengandeh. Idi teh ideh pebala, “Naké Tuhan idi dengan kai? Na susa' macing nekai.”

¹² Idi nekini, ngaceku sala' muyuh, Sion miak uen ngeradu mepad kudeng aceh lati', Yerusalim miak mangun ku aceh usag batu, idi surud su luk inan Ruma' Allah miak mangun ku pulung.