MIKA 1 - BALA LUK DO'

¹ Ini bala luk biré Tuhan ni Mika luk rat Moresét, kareb Yotam, Akas, idi Hesekia ngimet Yahuda. Idi ini luk sinier Mika ratnan Samaria idi Yerusalem.

Tido Kuan Samaria Idi Yerusalim

² O amung pupu, ninger bala ini idi amung muyuh luk tudo bang tana' ini! Tuhan Allah miak mangun ku lun nekali' ratnan muyuh. Ninger! Tuhan pebala rat ruma'Neh luk déi' Surga.

³ Tuhan macing rat su inanNeh luk meligan. Ieh temurun idi nalan luun pegkung.

⁴ Idi pegkung miak ubpa' liang daperNeh, mepad kudeng semara' luk remuno bang apui, idi raked pana' meturan, mepad kudeng abpa' luk manud rat luun surud.

⁵ Amung ini miak mangun ngaceku pupu Israil pangeh nenganau' sala', idi sikal metueh ratnan Allah. Idéké luk uen ngesala' ratnan dat lun Israil? Lun Samaria mo'! Idéké luk nguit nelun Yahuda sembayang inan akang? Lun Yerusalim mo'!

⁶ Ngaceku ineh kebala Tuhan, “Ui miak nganau' Samaria mangun ku aceh luk inan batu luk inusag, idi ku su luk inan nibu anggur. Ui miak ngutang amung usag bawang ineh luun raked, idi ngusag amung alen ruma'neh.

⁷ Amung-amung akangneh luk meraga miak uen mila' idi sabpen. Pupu ineh nengalap akangdeh ineh ku tabpar sétdeh dengan allah baken, idi nekini sala'deh pa kiung Allah miak uen ngua'.”

⁸ Idi kebala Mika, “Ngaceku ineh ui miak temido idi nalan lubpa dengan na kasut. Ui miak muni mepad kudeng bungalé idi suit luk muni kareb medacem.

⁹ Ngaceku urat Samaria na miak uen ngedo'. Yahuda pana' malé murat kudeng ineh teh. Até pangeh nacing inan amung-amung tanga' Yerusalim, su luk inan pupuku ineh mulun.”

Bunu' Amé' Matun Yerusalim

¹⁰ Aleg mada' nelun Gat ratnan laya' tau. Aleg nima' nedeh nier nemuyuh nangi'. O muyuh lun Bait Lapra, do' muyuh siluti bang abuh.

¹¹ O lun Sapir, do' muyuh tebanen dengan lubpa idi migu'. Lun luk tudo déi' Sanan na miak mulun. Kareb muyuh ninger lun Baitesel temido, idi muyuh kali' na luk inan sigapung su ineh.

¹² Lun Marot tebukut ku étdeh, idi ideh pian uen ngedo', ngaceku Tuhan pangeh nengacing susa' muneng ku Yerusalim.

¹³ O muyuh lun Lakis, nganau' kuda muyuh pa atun keréta. Iko nenginud sala' lun Israil, pad iko nguit nelun Yerusalim nganau' sala'.

¹⁴ Idi nekini O pupu Yahuda, do' muyuh buro rat Moresét Gat. Raca'-raca' Israil na miak ngalap pedengan rat bawang Aksib.

¹⁵ O lun bang bawang Marisa, Tuhan miak maré nemuyuh bang palad aceh bunu' luk miak ngaro bawang muyuh. Raca' Israil miak sigapung bang lubang batu déi' Adulam.

¹⁶ O lun Yahuda, do' muting abpuk muyuh idi temido anak luk inan muyuh mawa. Mutal uluh muyuh mepad kudeng kanui, ngaceku ideh miak lapen rat nemuyuh.