MALAKI 4 - BALA LUK DO'

Kareb Acing Aco Tuhan

¹ Kebala Tuhan luk Melalud, “Ngerawé' do'-do', kareb aco ineh macing, amung-amung lemulun luk medita' niat idi luk dat miak meseb mepad kudeng geramih. Kareb aco ineh ideh meseb pad na luk ketecan.

² Iamo' kuan muyuh luk na maya' Negku, Ui miak maré laludKu luk ngulun, merasat luun muyuh mepad kudeng aco, pad ngedo' nemuyuh. Muyuh miak mepuit idi mawang niat, mepad kudeng anak sapi' luk rinuat rat bang libungdeh.

³ Muyuh miak metueh ratnan lemulun luk dat; ideh mepad kudeng abuh riduen muyuh kareb aco luk inanKu ngacing ukum.

⁴ “Do' ngerawé bada' demulunKu Musa, ieh ineh amung ukum luk biréKu neneh déi' luun Pegkung Sinai, luk miak bén amung pupu lun Israil.

⁵ “Iamo' kareb nateh aco Tuhan luk inan matot ineh macing, Ui miak ngecuk Nabi Elia amé' nemuyuh.

⁶ Ieh miak nguit taman pedo' dengan anak, idi anak pedo' dengan taman, pad Ui na macing idi ngusag bawang muyuh.”