LUN LUK NGUYUT 3 - BALA LUK DO'

Pupu Luk Ketecan Bang Bawang

¹ Idi ini amung lun pupu baken luk sinima' Tuhan, pad ideh nutun nelun Israil luk nateh nekali' pebunu' bang bawang Kanaan.

² Ieh nenganau' kudeng ineh pelée amung lun Israil miak pekalai pebunu', meluun teh kuan lun luk nateh nepebunu' atun.

³ Idi luk neketecan, ieh ineh limeh burur raca' lun Pilistin, idi amung lun Kanaani, lun Sidon, idi lun Hiwi, luk tudo luun Pegkung Lebanon, rat Pegkung Baal Hermon macing Ruan Hamat.

⁴ Ideh ineh ku nutun nelun Israil, pad nier nedeh, kudeng ideh maya' ukum luk birée Tuhan kuan tepundeh dengan tang Musa.

⁵ Idi lun Israil netudo arang lun Kanaani, lun Hiti, lun Amori, lun Prisi, lun Hiwi, idi lun Yebusi.

⁶ Idi ideh nengaweh nedeh idi nesembayang inan allahdeh.

Otniel

⁷ Idi lun Israil na nengerawée Tuhan Allahdeh. Ideh nenganau' sala' pa kiungNeh. Idi ideh nesembayang inan Baal idi Asterot.

⁸ Idi Tuhan museh nelun Israil. Idi Ieh nenima' Kusan Risataim, luk raca' Mesopotamia ngelaya' nedeh. Idi lun Israil bang imet raca' ineh ualuh lak kinioneh.

⁹ Idi lun Israil nengitang nawar Tuhan, idi Tuhan nemarée seburur lemulun luk nemuit nelun Israil, ieh ineh Otniel anak Kenas, kinanak Kaleb luk isuut.

¹⁰ Idi Roh Tuhan netemurun luunneh, pad ieh mangun ku lun nguyut nelun Israil. Idi Otniel inée' pebunu'. Idi Tuhan nemarée tueh kuanneh kareb ieh nepebunu' inan raca' Mesopotamia.

¹¹ Idi bawang ineh na inan bunu' apat ngepulu' lak kinioneh. Idi Otniel Kenas natée.

Ehud

¹² Idi sekua' teh lun Israil nenganau' sala' pa kiung Tuhan. Ngaceku ineh Tuhan nenganau' Eglon, raca' lun Moab, metueh rat nelun Israil.

¹³ Idi Eglon nepamung dengan lun Amon idi lun Amalek. Idi ideh nengelaya' nelun Israil idi nengalap Bawang Piasau.

¹⁴ Idi lun Israil bang imet Eglon, pulu' ualuh lak kinioneh.

¹⁵ Idi lun Israil nengitang nawar Tuhan, idi Ieh nemarée seburur lemulun luk nemuit nedeh, ieh ineh Ehud Gera, ratnan inul Beniamin. Idi ieh seburur lun luk mekabing. Idi lun Israil nengecuk neneh nguit usin pupuk kuan Eglon, raca' lun Moab ineh.

¹⁶ Idi Ehud nenganau' aceh pelapet luk tadem pekop, sesikuh kikadangneh, idi nengapung ineh pa liang kuyu'neh pa tinueh.

¹⁷ Idi ieh nenated usin pupuk ineh kuan Eglon, ieh ineh seburur lemulun luk pelaba lamu.

¹⁸ Idi kareb Ehud pangeh nemarée usin pupuk ineh idi ieh nengecuk nelun luk inée' maya' neneh muli'.

¹⁹ Idi ieh sebuleng nelemubed rat ku batu luk inarit luk muneng ku Gilgal, idi ieh inée' papu' raca', kebalaneh neneh, “O tuanku, inan sebila' bala luk pian beléenku namu dengan lulem.” Idi kebala raca' kuan luk dukenneh, “Buro muyuh.” Idi amung-amungdeh neremuat.

²⁰ Idi Ehud inée' matun raca' kareb ieh tudo bang takepneh luk do' bui. Idi kebala Ehud neneh, “Inan aceh bala ratnan Allah kuanmu.” Idi raca' ineh nudur.

²¹ Idi Ehud nengalap pelapetneh ku ticu'neh pa kabing, luk inapungneh i awa'neh pa tinueh. Idi ieh nenebpek batek raca',

²² pad tunanneh pana' nesemuet bang bururneh perapu uangneh. Idi tunanneh nebpu ku lemakneh, ngaceku ieh na nengangat neneh. Idi pelapet nepesut su puetneh.

²³ Idi Ehud neremuat, idi nemasak tanga' ineh.

²⁴ Idi ieh neburo. Idi lun duken raca' nacing, idi ideh nenier tanga' ineh pinasak. Idi keterawéedeh, ieh bubpa' bang takep ineh.

²⁵ Idi ideh nenganéet neneh, iamo' na ieh nengukab tanga'. Idi ideh nengalap taka tanga' ineh idi nengukab ineh idi ideh nenier tuandeh pangeh natée.

²⁶ Idi laba' ideh nganéet munung tanga' ineh idi Ehud neburo. Idi ieh nelemaba batu luk inarit ineh inée' déei' Sira.

²⁷ Kareb ieh nacing déei', idi ieh nengiup unga dumbaneh luun pegkung-pegkung Epraim nawar nelun Israil amée' pebunu'. Idi ieh nenguit nedeh musul pegkung ineh.

²⁸ Kebalaneh nedeh, “Maya' negku. Ngaceku Tuhan marée nemuyuh metueh ratnan bunu' muyuh lun Moab.” Idi amungdeh nemaya' neneh. Idi ideh nengalap su luk inan lun Moab guta Abpa' Yarden. Na ideh nemarée seburur pana' guta ieneh.

²⁹ Idi kareb ineh ideh nengatée 10,000 burur lun Moab luk metueh. Idi seburur pana' nateh luk nepuit.

³⁰ Idi lun Israil nengelaya' Moab bang aco sineh, idi bawang ineh na inan bunu' ualuh ngepulu' lak kinioneh peh.

Samgar

³¹ Idi lun nguyut luk muci rat ni Ehud, ieh ineh Samgar anak Anat, luk nengatée 600 burur lun Pilistin ku rukud lun ngasa' sapi'. Ieh pana' nemuit nelun Israil.