LUN LUK MADA' 9 - BALA LUK DO'

¹ Mio tu-tu ui nengerawé ratnan amung ini, pad ui kali' Allah ngimet kekamen lemulun luk mileh idi matu, awadeh idi gatehdeh pana'. Lemulun na kali' luk mangun kuanneh muci.

² Iamo' na mekudeh. Kekiped lemulun luk matu idi lemulun luk dat mepad mo', ieh ineh lemulun luk meligan idi lemulun luk mesala', lemulun luk sembayang idi lemulun luk na sembayang, lemulun luk maré baré idi lemulun luk na maré baré. Kudeng ineh teh lemulun luk do' idi lemulun luk dat, lemulun luk pebulung idi lemulun luk na pebulung.

³ Kekiped amung-amung lemulun bang tana' ini mepad mo'. Ini na petulu! Ruked ulundeh lemulun ngerawé ratnan luk dat idi luk mebacé, idi denak-denak ideh maté.

⁴ Lemulun luk mulun inan rapet. Uko' luk mulun meluun do' ratnan balang luk naté.

⁵ Ngaceku lemulun luk mulun kali' anun-anun, idi na luk lapendeh teh, idi ideh na uen ngerawé teh.

⁶ Awadeh, gatehdeh, idi pinian bururdeh naté dengandeh. Na ideh ngalap babpat bang luk ruen bang tana' ini teh.

⁷ Ngaceku ineh do' iko kuman idi ngirup dengan mawang niat. Allah pangeh nengeperuan namu.

⁸ Do' ngayung ku luk do', idi ngumau uluhmu.

⁹ Do' mawang niat inan awan luk inanmu mawa, ruked ulunmu luk mekamu' luk biré Allah kuanmu. Ngaceku ini babpatmu ratnan ulun idi kekamenmu bang tana' ini.

¹⁰ Do' mekél nganau' amung kekamenmu, ngaceku su luk inan até — su luk ulekmu ineh, na luk idi kekamen, terawé, ileh, idi do' kali'.

¹¹ Idi teh ui kali', bang tana' ini lemulun luk meluun awer na megéi' metueh kareb peribatun, idi lemulun luk mesangit na megéi' metueh kareb pebunu'. Lemulun luk mileh na megéi' petap akan, idi lemulun luk do' kali' na megéi' ngalap mula' binaweh, idi lemulun luk mileh nganau' anun-anun na megéi' mangun ku lun rayeh. Susa' miak macing kuan amung-amung lemulun.

¹² Iko na kali' kareb tarekmu macing. Mepad kudeng suit denak-denak mekaneh abpung, idi mepad kudeng lawid mekaneh pukat, kudeng ineh teh tau lemulun denak-denak mekaneh susa'.

Tuda'-Tuda' Terawé Ratnan Ileh Idi Bacé

¹³ Inan teh luk kali'ku luk ngegala' terawé ulun tana' ini ratnan ileh.

¹⁴ Inan aceh bawang luk isuut, idi na mula' lemulun. Seburur raca' luk metueh nengerieng neneh. Ieh nengelibut neneh pad ieh miak ngusag libungneh.

¹⁵ Inan seburur lun luk masi' bang bawang ineh luk petap ileh ngulun bawang ineh. Iamo' seburur pana' nateh luk nengerawé neneh.

¹⁶ Kebalaku, Ileh ineh meluun do' ratnan tueh, iamo' na tau ngerawé lun masi' mileh idi na tau pian ninger balaneh.

¹⁷ Meluun do' ninger lun mileh pebala dengan suut tang ratnan ninger raca' ngitang bang gayam arang lemulun luk mebacé.

¹⁸ Ileh meluun do' ratnan repapeh bunu', iamo' sebuleng sala' mo' miak ngusag mula' luk do'.