LUN LUK MADA' 8 - BALA LUK DO'

¹ Lemulun luk mileh mo' kali' ilung luk amung-amung. Ileh nganau' neneh merimud pad ieh na tekedamut.

Maya' Bala Raca'

² Do' maya' bala raca'. Idi aleg pejani' inan Allah mo'-mo'.

³ Raca' miak nganau' luk pianneh. Aleg tuped iringneh pad iko na mekaneh susa'.

⁴ Raca' inan lalud, idi lun baken na miak mebpeng neneh.

⁵ Kudeng iko maya' balaneh na iko mesusa'. Idi lemulu luk mileh kali' luk petulu ruenneh.

⁶ Inan kareb idi dalan luk petulu kuan amung-amung luk ruen tau. Iamo' tau na petap ileh.

⁷ Seburur pana' nateh arang tau luk kali' luk mangun muci, idi idéké luk mada' netau?

⁸ Seburur pana' nateh luk miak ngagka' aténeh, pad ieh ngiuk aco luk inanneh maté. Na tau miak mepuit ratnan bunu' ineh. Lemulun luk dat na miak puatin ku datneh.

Lemulun Luk Dat Idi Lemulun Luk Matu

⁹ Ui kali' amung ini kareb ui nengerawé ratnan ulun tana' ini, ngaceku sebuang lemulun inan lalud, idi lun baken medereh pa liang imetdeh.

¹⁰ Mo, ui pangeh nekali' lemulun luk dat tinanem. Idi arang dalan kareb ideh muli' rat lengutan, lemulun luk dat ineh buren bang bawang su luk inandeh nenganau' datdeh. Iamo' na ulekneh.

¹¹ Anunké punneh lemulun pian nganau' luk dat? Ngaceku kekamen luk dat na saget kumin.

¹² Rabpu'-rabpu' lun mesala' nganau' meratu kekamen luk dat idi simén mulun teh. Iamo' ui kali' lemulun luk matot inan Allah miak uen ngeperuan ngaceku matot Neneh,

¹³ idi lemulun luk dat na uen ngeperuan, idi na ieh mekadang ulun ngaceku na ieh matot inan Allah. Ieh mepad kudeng aca' mo'.

¹⁴ Iamo' inan luk na petulu bang tana' ini. Rabpu'-rabpu' lemulun luk matu ngalap ukum lemulun luk dat, idi lemulun luk dat ngalap tabpar lemulun luk matu. Ini pana' na ulekneh!

¹⁵ Idi ui kali' luk meluun do' kuan lemulun, ieh ineh kuman, ngirup, idi mawang niat. Idi ini luk miak ruenneh kareb ieh ngakem ruked ulunneh luk barén Allah bang tana' ini.

¹⁶ Kareb ui nutun ngalap ileh idi nesibada' ku luk mangun bang tana' ini, idi ui kali' sagan tu pana' lemulun na rudap kedangan tebaco,

¹⁷ nateh ieh kali' luk ruen Allah. Kudeng apeh pana' tuehmu nutun, iko na miak kali'. Kian, lun luk mileh ngerawé nedeh kali' lek. Iamo' nateh ideh kali'.