LUN LUK MADA' 7 - BALA LUK DO'

Terawé Ratnan Ulun

¹ Ngadan luk do' meluun do' ratnan umau luk do' buen luk meraga, idi aco atému meluun do' ratnan aco luk inanmu tinganak.

² Meluun do' amé' ruma' su luk inan lemulun nangi' ngaceku lun naté ratnan amé' ku irau, ngaceku do' tau megéi' ngerawé ratnan até luk macing kuan tau amung.

³ Susa' meluun do' ratnan riruh; sagan tu pana' iko tekedamut, ilehmu amé' metadam ku ineh.

⁴ Lemulun luk megéi' ngerawé ratnan ngawang niatneh mebacé. Lemulun luk mileh ngerawé ratnan até.

⁵ Meluun do' badén lun luk mileh ratnan buren lun luk mebacé.

⁶ Riruh lun luk mebacé mepad kudeng uni tabpa' luk ngetek kareb ieh meseb ku apui. Na tu ilungneh.

⁷ Kareb lun mileh naluk, ieh mepad kudeng lemulun luk mebacé. Ngalap suap idi iko ngusag ulunmu.

⁸ Kekiped anun-anun meluun do' ratnan punneh. Ulai niat meluun do' ratnan medita' niat.

⁹ Aleg malé museh. Lemulun luk mebacé mo' luk mét niat.

¹⁰ Aleg pebala, “Ngudehké ulun tau mon meluun do'?” Ini aceh itun luk mebacé.

¹¹ Amung lemulun luk nier aco, petulu ngalap ileh. Ieh ineh mepad kudeng ngalap aceh babpat binaweh.

¹² Ileh meluun do' ratnan usin. Ileh matar ulunmu — ini punneh ileh luk meluun do'.

¹³ Ngerawé ratnan luk inau' Allah. Idéké miak ngesiri luk inau' Allah tekilu'.

¹⁴ Kareb iko uen ngeperuan, do' iko mawang niat, idi kareb inan susa' do' iko ngerawé: Allah maré awang idi susa' pana'; idi na iko kali' luk miak mangun muci.

¹⁵ Ulunku mo'-mo' mo'. Iamo' ui pangeh nekali' luk amung-amung. Lemulun luk do' miak maté, idi lun baken luk dat miak mulun.

¹⁶ Aleg iko pelaba do' idi aleg iko pelaba ileh — ngudehké iko ngusag ulunmu?

¹⁷ Iamo' aleg iko pelaba dat idi pelaba bacé, pad iko maté kareb nateh tarekneh.

¹⁸ Do' ngalap terawé luk muned. Kudeng iko matot inan Allah, luk ruenmu miak mangun.

¹⁹ Ileh ngetueh seburur lemulun meluun ratnan pulu' raca' miak ngetueh aceh bawang.

²⁰ Seburur pana' nateh luun tana' ini luk megéi' nganau' luk matu dengan na tu-tu nganau' sala'.

²¹ Aleg iko ninger bala lemulun — kian iko miak ninger demulunmu ngedat namu lek,

²² idi iko sebuleng kali' iko megéi' kua' ngedat nelun baken.

²³ Ui nenutun amung ini ku ilehku. Kebalaku, “Ui pian ngeriput ilehku.” Iamo' ieh ineh mado rat negku.

²⁴ Kudeng apehké lemulun miak kali' ilung ulun tana' ini? Ieh ineh pelaba dalem idi pelaba ikat.

²⁵ Iamo' ui mekél sibada' pad nakap ileh idi or kuan amung-amung itunku, pelé ui kali' bacé idi ruden ineh pelaba dat.

²⁶ Ui kali' luk meluun pét ratnan até, ieh ineh decur. Niatneh mangun ku abpung luk ngakem namu, ieh ineh mepad kudeng rabat, idi kareb ieh ngapel namu, ticu'neh mepad kudeng luk ku ngaling. Lemulun luk maya' pian Allah miak buro, iamo' ieh ngakem lun mesala'.

²⁷ Mo, kebala Lun luk Mada', Ui sibada' ini pad iuk-iuk inan ileh kareb ui nenakap or ineh.

²⁸ Iamo' mula' teh or luk na nekali'ku. Arang meribu lemulun ui kali' seburur deléi luk do', iamo' seburur decur pana' nateh luk do' arangdeh.

²⁹ Ini amung luk ui nesibada': Allah nenganau' netau mesiri, iamo' tau pangeh nakap dalan luk tekilu'.