LUN LUK MADA' 6 - BALA LUK DO'

¹ Ui kali' bang tana' ini, inan aceh susa' luk macing nan lemulun.

² Ieh ineh, Allah maré binaweh, ngadan, tana', idi amung luk pianNeh kuan seburur lemulun, iamo' na Ieh nima' neneh mawang niat ku amung ineh. Iamo' lun baken ngalap ineh. Na ulekneh idi na petulu.

³ Seburur lemulun miak inan meratu anak, idi mulun mio bang tana' ini, iamo' kudeng ieh na miak mawang niat ku luk ilapneh idi kekipedneh na ieh tinamen, meluun do' kuan anak luk maté karebneh uen nenganak.

⁴ Na ulekneh anak ineh uen nenganak; ieh petacu semuet bang dacem pad ieh na uen lun ngerawé.

⁵ Na ieh kali' acang aco, idi teh kudeng apeh ulun bang tana' ini. Iamo' ieh meluun samal

⁶ ratnan lemulun luk na mawang niat ku ulunneh bang tana' ini, sagan tu pana' ieh mulun dueh ngeribu lak. Naké su luk ulek didueh mepad?

⁷ Lemulun ngakem pad ngalap akan, iamo' megéi' na petap.

⁸ Kudeng apehké lun luk mileh meluun samal ratnan lun luk mebacé. Inanké ulek ileh kuan lun masi' bang tana' ini.

⁹ Na ulekneh; mepad kudeng ngerada' bui mo'. Meluun do' mawang niat ku luk bang paladmu ratnan megéi' nakap binaweh luk baken.

¹⁰ Amung-amung luk mangun pangeh litep rat mon, idi amung tau kali' seburur lemulun na miak pesaad nan lemulun luk metueh rat neneh.

¹¹ Pelaba ula' bala ngacing luk mo'-mo'. Anunké ulekneh kuan lemulun?

¹² Idéké luk miak kali' luk meluun do' kuan lemulun bang ulun tana' ini luk pelaba kamu', idi luk saget buro mepad kudeng aca'. Idéké luk kali' luk mangun bang tana' ini muci ratnan aténeh.