LUN LUK MADA' 5 - BALA LUK DO'

Aleg Pejani' Mo'-Mo'

¹ Ngerawé do'-do' kareb iko amé' bang ruma' sembayang. Do' amé' idi sibada'. Ieh ineh meluun do' ratnan maré baré maya' lawé lemulun luk na mileh ngiti luk matu idi luk na matu.

² Ngerawé kareb nateh iko pebala, idi aleg pejani' mo'-mo' pa kiung Allah. Ieh luk déi' surga, idi iko luk luun tana'. Ngaceku ineh aleg iko pelaba ula' buri'.

³ Kudeng iko megagau, iko mula' nupi luk dat, idi kudeng iko mula' buri', kali' rungen iko pebala luk mebacé.

⁴ Idi kareb iko pejani' inan Allah, do' petacu maya' ineh. Na Ieh pian ku lun luk mebacé. Nganau' luk pijani' mu ineh.

⁵ Meluun do' na tu-tu pejani', ratnan iko pejani' idi na maya' ineh.

⁶ Aleg nima' balamu nguit namu nganau' sala', pad iko pebala inan imam Allah, “Jani'ku ineh mo'-mo'.” Ngudehké iko ngacing useh Allah, pad Ieh ngusag amung luk inau'mu?

⁷ Sagan tu pana' iko mula' nupi idi mula' bala, idi kekamenmu na ulekneh, na miak na iko matot inan Allah.

Ulung Bang Tana' Ini Na Ulekneh

⁸ Kareb iko nier lun luk ngimet ngedereh nelun masi', idi na mutut ukum luk mesiri kuanneh, aleg iko mawa. Anid-anid burur lun ngimet inan luk meluun rayeh rat nedeh. Idi luk meluun rayeh ngimet amung-amungdeh ineh.

⁹ Raca' pana' merapet ku luk perinien.

¹⁰ Kudeng iko merapet ku usin, iko na miak uen ngebor, ngaceku iko pian ku meluun ula' binaweh teh. Na ulekneh!

¹¹ Kudeng iko ngalap meluun ula' binaweh, lemulun luk mula' miak kuman ineh. Iko ngalap ngadan lun do' mo'.

¹² Lemulun luk ngakem, do' rudap, sagan tu pana' na petap akan. Iamo' lun do' na do' rudap ngaceku megagau ngerawé mula' binaweh.

¹³ Ini aceh susa' luk sinierku bang tana' ini: lemulu nganug usindeh ngerawé muci aco,

¹⁴ iamo' amung-amung usin ineh metutu' ngaceku aceh kekamen luk na inan peruan, pad na luk ketecan kuan anakdeh.

¹⁵ Na luk iten ratnan luk ilap tau kareb tau necan tana' ini, ngaceku lubpa tau remuat rat bang nakan tinan tau. Idi kudeng ineh teh tau necan tana' ini.

¹⁶ Ini pana' na petulu. Mepad kudeng acing tau bang tana' ini, kudeng ineh teh kareb tau remuat. Sagan tu pana' tau megéi' nutun ngakem bui, anunké luk lapen tau?

¹⁷ Macing kekiped ulun tau, tau bang dacem, dengan susa', gagau, gateh, idi ét pana'.

¹⁸ Idi ui pangeh nekali': luk meluun do' kuan lemulun, ieh ineh kuman, ngirup idi mawang niat ku amung-amung luk ilapneh ratnan kekamenneh rukedneh mulun bang tana' ini. Ieh ineh luk biré Allah kuanneh.

¹⁹ Kudeng Allah maré binaweh idi tana' kuan lemulun, do' ieh mawang niat ku amung luk ilapneh ineh. Ieh ineh aceh baré luk biré Allah.

²⁰ Na ieh megagau ku ulun lemulun luk mekamu'. Ngaceku Allah nengawang niatneh.