LUN LUK MADA' 4 - BALA LUK DO'

¹ Idi sekua' teh ui nengerawé ratnan amung-amung luk na mesiri bang tana' ini. Lemulun luk pidereh nangi' idi na lun ngedengan nedeh, ngaceku lemulun luk ngedereh nedeh melalud.

² Ui ngerawé lemulun luk pangeh naté meluun samal ratnan lemulun luk mulun.

³ Iamo' meluun samal lemulun luk nateh tinganak idi luk nateh kali' amung-amung luk na mesiri bang tana' ini.

⁴ Idi teh ui kali' punneh lemulun mekél ngakem: ieh ineh pad ideh ngalap meluun ula' binaweh ratnan lun baken. Iamo' na ulekneh. Ieh ineh mepad kudeng ngerada' bui mo'.

⁵ Lemulun luk mebacé tudo mo', idi ieh iuk-iuk merugu' macing ieh maté.

⁶ Mo lek, iamo' meluun do' ngalap sesuut mo' dengan mawang niat, ratnan megagau kidi-kidi nutun ngakem bui dengan dueh ticu'.

⁷ Idi inan teh luk na ulekneh bang tana' ini.

⁸ Inan lemulun luk tudo sebuleng na lun dengan. Na anakneh, na kinanakneh, iamo' ieh megéi ngakem, ngaceku na ieh mawang niat ku ieh mula' binaweh teh. Kekamenneh kuan idéké? Ngudehké ieh na miak ngawang niatneh? Ini pana' na ulekneh, ngaceku mulun dengan mesusa'.

⁹ Dueh burur meluun do' ratnan seburur, ngaceku meluun do' kekamen didueh.

¹⁰ Kudeng seburur mebpeh, seburur ngiding neneh. Iamo' kudeng seburur mebpeh kareb ieh sebuleng, pelaba susa', ngaceku na lun ngedengan neneh.

¹¹ Kudeng meteneb, dueh burur miak pamung rudap pad do' lau'. Iamo' kudeng apehké seburur lemulun miak do' lau' kudeng ieh rudap sebuleng.

¹² Dueh burur lemulun miak metueh ratnan bunu' luk miak ngelaya' seburur lemulun. Mikat mutut kalat luk inau' ratnan teluh apid.

¹³ Anak adi' luk masi' idi mileh meluun do' ratnan raca' luk mengered idi mebacé luk na ninger bada'.

¹⁴ Anak adi' ineh miak remuat rat bang tutup pad mangun ku raca', kian ieh tinganak lun luk masi' bang bawang luk ruenneh ngimet muci Iek.

¹⁵ Iamo' ui nengerawé ratnan amung-amung lemulun luk bang tana' ini, idi ui pangeh kali' arangdeh inan aceh anak adi' luk ngelibal raca'.

¹⁶ Sagan pana' anak itin raca' pelaba ula', kareb ieh maté seburur pana' na mawang niat ku luk pangeh inau'neh. Na ulekneh. Mepad kudeng ngerada' bui mo'.