LUN LUK MADA' 2 - BALA LUK DO'

¹ Ui pangeh nengerawé, “Do' ui nutun nganau' amung-amung luk ku ngawang niatku.” Iamo' setuneh amung ineh pana' na ulekneh.

² Ui pangeh nekali' riruh ineh mebacé, idi luk ku ngawang niat ineh na ulekneh.

³ Idi ui nenutun ngawang niatku ku abpa' anggur, pad ui miak kali' anun-anun luk do' ruen lemulun bang tana' ini ruked ulundeh. Iamo' bang amung ineh ui nenakap ileh, idi na rinaruh ku bacé.

⁴ Idi ui nenganau' mula' kekamen. Ui nemudut tuda'-tuda' ruma', idi nenibu tuda'-tuda' kabung anggur.

⁵ Ui nenganau' tuda'-tuda' kabun idi nenibu tuda'-tuda' bua'.

⁶ Ui nengukat takung idi abang dalan abpa'.

⁷ Ui nemelih mula' demulun. Idi inan teh demulun tinganak bang ruma'ku. Idi ui meluun ula' aya' rat nelun baken luk tudo' déi' Yerusalim rat mon.

⁸ Ui nenganug pirak idi amas ratnan binaweh raca' bang bawang-bawang luk inimetku. Deléi idi decur menani ngawang niatku, idi ui nengalap amung-amung luk pian lemulun.

⁹ Idi ui meluun do' rat nelun baken luk tudo déi' Yerusalim rat mon, idi ilehku na buro rat negku.

¹⁰ Ui nengalap amung-amung luk pianku. Na ui nepatad ratnan anun-anun luk ngawang niatku. Ui mawang niat ku amung-amung kekamenku. Idi ineh mangun ku tabparku.

¹¹ Idi kareb ui nengerawé ratnan kélku idi amung-amung luk inau'ku, idi ui nekali' na ulekneh, iamo' mepad kudeng ngerada' bui' mo'.

¹² Ngaceku raca' miak nganau' luk pangeh inau' raca' luk ngimet atun mo'. Idi ui nengerawé ratnan ilung ileh, ruden, idi bacé.

¹³ Idi ui nekali', “Ileh meluun do' ratnan bacé, mepad kudeng acang meluun do' ratnan dacem.

¹⁴ Lemulun luk mileh kali' dalanneh, iamo' lemulun luk mebacé na kali' dalanneh.” Iamo' ui kali' amung-amung tau miak maté.

¹⁵ Idi ui nengerawé, “Luk macing kuan lun luk mebacé miak macing kuanku pana'. Anunké ulekneh ui pangeh nengalap ileh?” Idi ui nengor balaku sebuleng, “Na ulekneh, na ulekneh.”

¹⁶ Lun luk mileh idi lun luk mebacé na miak uen lun ngerawé. Muci aco idi amung-amung tau mekelupan lun. Amung-amung tau maté. Lun mileh idi lun luk mebacé pana'.

¹⁷ Ngaceku ineh ulun bang tana' ini na ulekneh kuanku, ngaceku susa' mo' luk uenneh ngacing kuanku. Amung–amung ineh na ulekneh, iamo' ui pangeh nengerada' bui mo'.

¹⁸ Kélku idi luk ilapku na ulekneh, ngaceku ui kali' amung luk ilapku ineh miak tacin kuan lun luk ngelibal negku mangun ku raca',

¹⁹ idi ieh mileh lek, kian mebacé lek. Idé luk kali'? Ieh miak ngimet amung-amung luk ilapku bang tana' ini, ngaceku kél idi ilehku. Na ulekneh.

²⁰ Idi ui nenginuud ratnan kélku.

²¹ Lemulun ngakem dengan tueh, ileh, idi do' kali', iamo' luk lapenneh miak tacin kuan lemulun luk na mekél nakap ineh. Na ulekneh idi teh na petulu!

²² Lemulun ngakem ruked ulunneh dengan megagau. Idi anunké tabparneh?

²³ Amung-amung luk ruenneh ruked ulunneh ngacing susa' idi dereh mo'. Kareb medacem pana' ieh na miak ugka' ngerawé. Na ulekneh!

²⁴ Luk meluun do' kuan lemulun, ieh ineh kuman, ngirup, idi mawang niat ku amung-amung luk ilapneh ratnan kekamenneh. Iamo' ui kali' amung ineh pana' macing ratnan Allah.

²⁵ Kudeng na pieh kudeng ineh lemulun na miak kuman idi mawang niat.

²⁶ Allah maré ileh, do' kali', idi awang kuan lemulun luk inanNeh mawang niat, iamo' lun mesala' dukenNeh ngakem idi ngamung binaweh luk barén kuan lun baken luk inan Allah mawang niat. Na ulekneh! Mepad kudeng ngerada' bui mo'.