LUN LUK MADA' 12 - BALA LUK DO'

¹ Idi ngerawé Allah luk nemudut namu kareb iko anak adi', kareb nateh aco susa' macing idi iko pebala, “Na ui mawang niat ku ulun tana' ini,”

² ieh ineh kareb acang aco, bulan, idi gituen na merasat kuanmu idi laput megéi' lemubed nguit udan.

³ Idi ticu'mu luk pangeh nematar namu miak megegker idi kukudmu luk metueh nekini miak melaya'. Lipenmu mabud pad iko na miak ngagat idi meseraber siren matehmu.

⁴ Idi iko mebengel pad na miak ninger ria' luk déi' liang. Na iko miak ninger uni lun luk tupeh idi lun luk menani, iamo' iko kulat ku uni suit.

⁵ Iko miak matot ku su luk medita', idi iko mesusa' nalan. Abpukmu amé' mebuda' idi iko na pian pamung dengan awanmu teh. Tau amé' su luk inan tau ngato erur tau luk kekiped, idi lemulun temido maya' dalan.

⁶ Kaling pirak miak meputul, idi lapung amas miak mebpeh idi mebila'' abet sidangur miak meputut, idi sidangur miak mebila'.

⁷ Burur tau miak muli' amé' ku abuh tana' ini, idi roh tau lemubed kuan Allah luk nemaré ulun kuan tau.

⁸ Na ulekneh, na ulekneh, kebala Lun luk Mada'. Amung ineh na ulekneh.

Kekiped Amung Bala

⁹ Iamo' ngaceku Lun luk Mada' ineh mileh, ieh na nugka' mada' luk nekali'neh. Ieh nesibada' ratnan balé' idi nenutun nedeh ku matu.

¹⁰ Lun luk Mada' ineh nenutun nakap bala luk ngubuk, iamo' balaluk inayudneh matu.

¹¹ Bala lemulun luk mileh mepad kudeng rukud lun luk matar dumba luk metadem. Ideh pangeh biré Allah luk mangun ku Lun luk Matar netau amung.

¹² O Asi, matar do'-do' ratnan ini teh. Inan pelaba ula' surat luk inayud, na kekipedneh. Kudeng iko nutun sibada' ku amung ineh, iko merur mo'-mo'.

¹³ Idi kekiped balaku: Matot inan Allah, idi maya' amung ukumNeh, ngaceku ini punneh lemulun pangeh pinudut. Allah miak ngukum amung-amung kekamen tau luk do', luk dat, idi luk inalum pana'.