LUN LUK MADA' 11 - BALA LUK DO'

Kekamen Lun Mileh

¹ Do' pepua' ku binawehmu déi' bawang baken, idi muci iko miak ngalap utung.

² Maré binawehmu kuan tuda'-tuda' bawang, ngaceku iko na kali' susa' luk miak macing namu bang tana' ini.

³ Su apeh aceh lawa kayuh meluka', su ineh teh inanneh telubid. Kudeng aceh laput mitem, kali' rungen inan udan.

⁴ Kudeng iko nganét bui idi kareb luk petulu, na tu-tu iko miak nibu anun-anun pana', idi teh na luk perinien.

⁵ Allah nenganau' luk amung-amung idi iko na miak kali' ilung luk ruenNeh, mepad kudeng iko na kali' kudeng apeh anak luk pun ngimun bang nakan tinanneh.

⁶ Do' nibu luk tibuenmu pa pekak idi pa malem teh, ngaceku iko na kali' sapeh luk do' ulun idi sapeh luk dat ulun.

⁷ Acang aco pelaba do' siren mateh tau.

⁸ Do' mawang niat ku ulunmu anid lak. Sagan tu pana' ulunmu mekadang, do' iko ngerawé amung aco luk inanmu tudo bang dacem até. Na luk inanmu mawang niat muci.

Bada' Kuan Anak Adi'

⁹ Do' iko mawang niat idi do' ria' kareb iko anak adi'. Nganau' luk do' sirenmu idi luk pian niatmu. Iamo' do' ngerawé Allah ngukum namu maya' kekamenmu.

¹⁰ Aleg iko megagau ku luk anun-anun pad iko na mesusa'. Na iko mio ku anak adi'.