LUN LUK MADA' 10 - BALA LUK DO'

¹ Butung laled miak nganau' umau luk do' buen dat buen, idi sesuut bacé ngagka' ileh luk rayeh.

² Lemulun luk matu pian nganau' luk do'. Lemulun luk mebacé pian nganau' sala'.

³ Bacéneh megala' kuan sakai pana'. Ieh mada' bacéneh siren amung-amung lemulun.

⁴ Kudeng raca' museh namu, aleg iko ugka' ratnan kekamenmu. Iko miak ngalap do' ratnan sala' luk rayeh kudeng iko mulai niat.

⁵ Ini aceh kekamen luk na mesiri bang tana' ini luk inau' raca'-raca'.

⁶ Ideh ngikit lemulun luk mebacé mangun ku lun rayeh. Iamo' ideh ngebeneh nelun do'.

⁷ Ui pangeh nenier demulun maya' kuda, iamo' lun do' luk nalan kukud mepad kudeng demulun.

⁸ Kudeng iko ngukat lubang, iko pana' mebpeh bang ineh. Kudeng iko ngusag lubang batu, iko gitapen menipeh.

⁹ Kudeng iko ngukat batu, iko meritep ku batu ineh. Kudeng iko ngapak kayuh, iko medecat ku ineh.

¹⁰ Kudeng uaimu mengadel idi iko na ngir idi, iko merur ngakem ku ineh. Meluun do' ngarawé atun.

¹¹ Na ulek ilehmu marot ku menipeh kudeng iko nima' menipeh ngatep namu atun.

¹² Lemulun luk mileh miak buren ngaceku balaneh, iamo' bala lun luk mebacé ngusag ulunneh.

¹³ Ieh ngimun dengan bala luk mebacé, idi kekipedneh balaneh mepad kudeng bala lun meruden.

¹⁴ Lun mebacé na mileh pirud. Seburur pana' nateh luk kali' luk miak mangun muci, idi luk mangun muci ratnan até tau.

¹⁵ Kudeng lemulun luk mebacé ngakem, ieh pelaba erur. Idi ieh na miak amé' kadai ngaceku ieh na kali' dalan.

¹⁶ Aceh bawang mekaneh susa', kudeng raca' malé buken idi kudeng lun rayeh-rayeh irau kedangan-kedangan.

¹⁷ Iamo' samal kuan bawang luk kuan raca' luk mileh mutut ukum kuan bururneh sebuleng, idi luk kuan lun rayeh-rayeh luk kuman bang kareb luk petulu, idi luk ngimet bururdeh idi na mabuk.

¹⁸ Kudeng lemulun pelaba kupé na ngelibal apo ruma'neh, kali' rungen apo ruma'neh meratan idi ruma'neh pana' merapuk.

¹⁹ Kuman idi ngirup ngawang niatmu. Iamo' kudeng na usin na luk kenen idi na luk rupen.

²⁰ Aleg ngilang raca' bang niatmu pana', idi aleg ngedat lun do' bang takepmu sebuleng pana'. Kian suit miak ngatum buri'mu lek.