LUN LUK MADA' 1 - BALA LUK DO'

Ulun Tana' Ini Na Ulekneh

¹ Ini bala Lun luk Mada', ieh ineh anak Daud, luk raca' déi' Yerusalim.

² Na ulekneh, na ulekneh, kebala Lun luk Mada'. Ulun tana' ini na ulekneh.

³ Lemulun ngakem ruked ulunneh, idi na uli'neh.

⁴ Inul-inul pelibal, iamo' tana' ini na misu'.

⁵ Aco masat idi aco macep maya' dalan luk pekalai.

⁶ Ulek bui, ieh ineh pa kabing busat aco idi pa tinueh busat aco, lemibung-lemibung idi lemubed amé' su inanneh teh.

⁷ Amung-amung abpa' manud macing inan abpa' rayeh, iamo' su inan abpa' rayeh nateh mepanu'. Abpa' lemubed amé' ku udan idi manud sekua' teh amé' bang abpa' rayeh.

⁸ Idi lemulun musam ku amung-amung ineh, pad ieh melibo ngerawé ineh. Na lemulun mawang niat ku amung luk sirenneh idi luk pedingerenneh.

⁹ Luk mangun atun mangun baruh teh. Luk inau' atun miak ruen baruh teh. Aput-aput tana' na anun-anun luk mebaruh.

¹⁰ Kebaladeh, “Siruh! Ini aceh luk mebaruh!” Na tu, amung ineh pangeh nangun atun kareb nateh tau tinganak.

¹¹ Seburur lemulun pana' nateh kali' luk pangeh nangun atun, idi muci ratnan ini.

Luk Nekali' Lun Luk Mada'

¹² Ui ini, Lun luk Mada', mangun ku raca' Israil déi' Yerusalim.

¹³ Ui nengeletep terawéku, pian sibada' ratnan amung-amung kekamen bang tana' ini. Kekamen luk biré Allah kuan lemulun pelaba ikat.

¹⁴ Ui pangeh nenier amung luk ruen bang tana' ini, idi na ulekneh, mepad kudeng ngerada' bui mo'.

¹⁵ Luk tekilu' na miak ruen ngesiri, idi luk na idi na miak uen ngiap.

¹⁶ Ui pangeh nengerawé bang niatku, “Ui ini mangun ku lun rayeh idi meluun ileh ratnan amung-amung raca' luk nengimet Yerusalim atun. Ui kali' ilung ileh idi do' kali'.”

¹⁷ Ui pian ngitun arang do' kali' idi bacé, ileh idi ruden. Ini pana' mepad kudeng ngerada' bui.

¹⁸ Kudeng lemulun iuk amé' mileh, idi ieh iuk amé' mesusa', pad ilehneh luk mula' ineh ngurat neneh.