IAP 9 - BALA LUK DO'

Irau Paska Luk Kedueh

¹ Kebala Tuhan ni Musa déi' su luk ali-ali déi' Sinai, bang bulan aceh, lak luk kedueh, kareb lun Israil pangeh neremuat rat bang bawang Masir,

² “Do' lun Israil temina' nganau' Aco Rayeh Paska,

³ ieh ineh pa malem pulu' apat aco bulan ini, idi do' maya' amung dalan idi ukum luk pangeh litep.”

⁴ Idi Musa nengecuk nelun Israil nganau' kudeng ineh.

⁵ Idi ideh nenganau' irau ineh pa malem pulu' apat aco bulan aceh ineh, déi' su luk ali-ali déi' Sinai, maya' kudeng amung luk icuk Tuhan ni Musa.

⁶ Iamo' inan tuda'-tuda' burur luk melutak ngaceku nengakem butung lemulun, pad ideh na miak nganau' irau bang aco sineh. Idi ideh iné' papu' ni Musa idi Arun bang aco sineh teh.

⁷ Kebaladeh nedidueh, “Kai ini pangeh nelutak ku butung lemulun. Ngudehké kai na miak maré aceh baré kuan Tuhan bang kareb luk litep dengan amung lun Israil?”

⁸ Kebala Musa nedeh, “Nganét atun, pad ui ninger kudeng apeh bala Tuhan.”

⁹ Kebala Tuhan ni Musa,

¹⁰ “Do' mada' kuan amung lun Israil, Kudeng inan rat arang muyuh idi rat arang amung anak mupun muyuh luk nelutak ngaceku nengakem butung lemulun, idi kian inan luk pangeh nenalan iné' mado, do' ideh na nganau' Irau Paska bang aco sineh.

¹¹ Iamo' pa malem pulu' apat aco bulan dueh, do' ideh irau, idi kuman ruti luk na linamud, idi irin luk mepét teh.

¹² Idi aleg necan elaneh macing kenebpa. Idi teh aleg mutul tulangneh, maya' amung dalan idi ukum Irau ineh.

¹³ Iamo' kudeng inan lemulun luk meligan luk tudo, idi na ieh nganau' Irau ineh, ieh miak duken buro rat arang pupuneh, ngaceku na ieh maré baré kuan Tuhan bang kareb luk pangeh litep. Idi ieh miak mabeh sala'neh.

¹⁴ “Idi kudeng inan lun sakai luk tudo arang muyuh, do' ieh nganau' Irau Paska kuan Tuhan, maya' dalan idi ukumneh. Idi sebuleng dalan mo' kuan muyuh, do' lun sakai idi muyuh luk kuan bawang teh.”

Laput Luk Mepad Kudeng Apui

^15-16 Idi kareb aco luk inan nemudut Lepo su luk inan papu' Tuhan, idi inan aceh laput nengakeb Lepo ineh. Idi kareb malem, laput ineh mepad kudeng apui.

¹⁷ Idi idan-idan kareb laput ineh kemikit rat pa luun Lepo ineh, idi teh lun Israil nalan rat ieneh. Idi su luk inan laput ineh nugka' su ineh teh inan lun Israil nelupo.

¹⁸ Idi ratnan ecuk Tuhan lun Israil nalan. Idi ratnan ecuk Tuhan teh ideh nelupo. Idi seruked laput ineh ungeng pa luun Lepo su luk inan papu' Tuhan, ideh pana' tudo teh.

¹⁹ Idi sagan tu pana' laput ineh mio su ineh, iamo' lun Israil nemaya' bala Tuhan idi na ideh nalan.

²⁰ Rabpu'-rabpu' laput ineh na mio pa luun Lepo ineh, iamo' ideh nelupo maya' ecuk Tuhan, idi nalan maya' ecuk Tuhan teh.

²¹ Idi rabpu'-rabpu' laput ineh ugka' sealem mo', idi kareb laput ineh kemikit, ideh nalan. Kareb laput ineh kemikit, do' macang idi medacem teh idi ideh pana' nalan.

²² Sagan pana' dueh aco, sebulan, idi selak kinioneh laput ineh na kemikit, idi lun Israil pana' nateh nalan. Iamo' kareb laput ineh kemikit idi teh ideh nalan.

²³ Ratnan ecuk Tuhan ideh nelupo. Idi ratnan ecuk Tuhan teh ideh nalan. Ideh maya' ukum luk bida' Tuhan ni Musa.