IAP 7 - BALA LUK DO'

Keréta Luk Biré Kuan Tuhan

¹ Kareb Musa nemangeh Lepo su luk inan papu' Tuhan idi nengumau idi nengeligan ineh dengan amung repapehneh, idi teh bubpun dengan amung repapehneh,

² idi lun rayeh inul, ieh ineh lun rayeh pupu Israil luk nenganau' iap ineh,

³ nenguit barédeh iné' pa kiung Tuhan, ieh ineh anem keréta luk inan apo idi pulu' dueh sapi', dueh burur lun rayeh lun Israil maré sebuleng keréta, idi anid bururdeh maré sebuleng sapi'.

⁴ Kebala Tuhan ni Musa,

⁵ “Do' iko ngalap amung baré ineh ku kekamen Lepo su luk inan papu' Tuhan. Idi maré amung ineh kuan lun Liwi maya' kekamendeh.”

⁶ Idi Musa nemaré sapi' idi keréta ineh kuan lun Liwi.

⁷ Idi dueh keréta idi apat sapi' biréneh kuan lun pupu Gerson.

⁸ Idi apat keréta idi ualuh sapi' biréneh kuan lun pupu Merari. Amung kekamendeh ineh pa liang imet Itamar anak Arun luk imam.

⁹ Iamo' Musa na nemaré keréta idi sapi' kuan lun Kohat, ngaceku kekamendeh ineh nginita repapeh luk meligan luk ruendeh mirir.

Baré Luk Ngeligan Bubpun

¹⁰ Idi lun rayeh-rayeh nemaré baré luk ngeligan bubpun ineh. Kareb ideh nengimun maré barédeh pa atun bubpun,

¹¹ idi kebala Tuhan ni Musa, “Do' ideh maré baré seburur seaco, pad ngeligan bubpun ineh.”

^12-83 Ideh nemaré barédeh maya' lawé ini: Pupu Lun Rayeh Inul Yahuda Nasun Aminadab Iskar Netanel Suar Sebulon Eliab Helon Rubin Elisur Sedur Simion Selumil Surisadai Gad Eliasap Ruel Epraim Elisama Amihud Manasé Gamalil Pedasur Beniamin Abidan Gidioni Dan Ahiser Amisadai Aser Pagiel Okran Naptali Ahira Enan Amung barédeh mepad mo', ieh ineh sebuleng bigan pirak, beratneh 130 balad pirak, idi sebuleng bigan pirak, beratneh 70 balad pirak, maya' balad pirak Su luk Meligan; dueh bigan ineh panu' ku banak luk rinabur ku umau, mangun ku baré akan; idi sebuleng bigan amas beratneh pulu' balad amas panu' ku umau luk do' buen; idi teh sebuleng anak sapi', sebuleng dumba deléi, idi sebuleng anak dumba deléi luk ulun selak mangun ku baré luk sabpen; idi sebuleng amék deléi mangun ku baré ngaceku sala'; idi teh dueh sapi' deléi, limeh dumba deléi, limeh amék deléi, idi limeh anak dumba deléi luk ulun selak mangun ku baré luk nguit pedo'.

Pupu Lun Rayeh Inul

^84-88 Kinula' baré luk inuit pulu' dueh burur lun rayeh ineh, luk ku ngeligan bubpun, ieh ineh: — pulu' dueh bigan pirak luk isuut, idi pulu' dueh bigan pirak luk rayeh, beratdeh 130 balad pirak Su luk Meligan — pulu' dueh bigan amas panu' ku umau luk do' buen, beratdeh 120 balad pirak Su luk Meligan — pulu' dueh sapi' deléi, pulu' dueh dumba deléi, idi pulu' dueh anak dumba luk ulun selak perapu dengan baré akan — pulu' dueh amék deléi barén ngaceku sala' — dueh ngepulu' apat sapi' deléi, anem ngepulu' dumba deléi, anem ngepulu' amék, anem ngepulu' anak dumba luk ulun selak ku baré luk nguit pedo'.

⁸⁹ Idi anid kareb Musa nesemuet bang Lepo su luk inan papu' Tuhan, idi ieh neninger Tuhan pebala neneh rat pa luun kakeb su luk inan pedo', luk nan Pati' Pejani' rat arang dueh burur melaikat karub ineh.