IAP 6 - BALA LUK DO'

Ukum Ratnan Lun Nasiri

¹ Kebala Tuhan ni Musa,

² “Do' mada' kuan amung lun Israil, kudeng idé-idé nganau' aceh pejani' lun Nasiri, pian ngatad bururneh kuan Tuhan,

³ do' ieh na ngirup abpa' anggur, idi borak, aleg ieh ngirup abpa' luk inau' ratnan bua' anggur, aleg ieh kuman bua'neh, do' luk mebaruh idi luk tekering pana'.

⁴ Seruked aco luk pijani'neh, ieh na miak kuman anun-anun luk ratnan bua' anggur, do' ilung idi kulitneh pana'.

⁵ “Seruked aco luk pijani'neh, ieh na miak muting abpukneh idi mingit pana', pad mabud aco luk pijani'neh kuan Tuhan ieh miak meligan. Do' ieh nima' amung abpukneh mekadang.

⁶ Idi aleg ieh amé' muneng ku butung,

⁷ sagan tu pana' ieh tamanneh, tinanneh, kinanakneh luk deléi idi decur. Ieh na miak ngelutak bururneh ku butungdeh, ngaceku abpukneh ineh mangun ku tanu' pejani' kuan Allah.

⁸ Seruked aco luk pijani'neh ieh meligan kuan Tuhan.

⁹ “Iamo' kudeng seburur lemulun maté denak-denak iringneh, pad ieh ngelutak abpukneh luk pijani' ineh, idi do' ieh ngiki uluhneh kareb aco luk inanneh uen ngeligan, ieh ineh aco luk ketudu'.

¹⁰ Idi kareb aco luk kewaluh do' ieh nguit dueh suit sukur kian dueh suit limun kuan imam idi barén neneh munung tanga' Lepo su luk inan papu' Tuhan.

¹¹ Idi do' imam maré sebuleng mangun ku baré ngaceku sala' idi sebuleng mangun ku baré sabpen, pad nganau' luk nguit pedo' kuanneh, ngaceku ieh pangeh mesala' ku butung ineh. Idi do' ieh ngeligan uluhneh kareb aco sineh teh.

¹² Idi do' ieh ngatad bururneh kuan Tuhan seruked aco luk pijani'neh, idi ieh nguit aceh anak dumba deléi luk ulun selak barén ngaceku kekamen luk dat. Idi amung aco luk atun na miak iapin, ngaceku ieh pangeh nengelutak abpukneh.

¹³ “Idi ini ukum lun Nasiri ineh. Idi kareb aco luk pijani'neh mabud, do' ieh iten amé' munung tanga' Lepo su luk inan papu' Tuhan.

¹⁴ Idi ieh miak maré aceh baré kuan Tuhan, ieh ineh aceh anak dumba deléi luk ulun selak luk do' mangun ku baré luk sabpen, idi sebuleng dumba tineh luk ulun selak luk do' mangun ku baré ngaceku sala', idi sebuleng dumba deléi luk do' mangun ku baré luk nguit pedo'.

¹⁵ Idi do' ieh nguit aceh tayen luk inan ruti luk na linamud, ieh ineh pinaram luk inau' ratnan banak luk rinabur ku umau, idi tinapé luk na linamud luk linusi ku umau perapu ku baré akan idi baré luk rupen.

¹⁶ “Idi imam miak maré ineh pa kiung Tuhan idi nguit baré ngaceku sala' idi baré luk sabpen ineh.

¹⁷ Idi do' ieh maré kuan Tuhan dumba deléi ineh mangun ku baré luk nguit pedo', perapu dengan tayen luk inan ruti ineh. Idi do' imam maré baré akan idi baré luk rupen teh.

¹⁸ Idi do' lun Nasiri ineh ngiki uluhneh munung tanga' Lepo su luk inan papu' Tuhan. Idi do' ieh ngalap abpuk luk pijani'neh ineh, idi ngerareng ineh luun apui luk inan ngeseb baré luk nguit pedo' ineh.

¹⁹ “Idi kareb lip dumba deléi ineh pangeh tinanek, do' imam ngalap selipa lip ineh, sebalad pinaram idi sebuleng tinapé luk na linamud rat bang tayen ineh, idi barén bang palad lun Nasiri ineh.

²⁰ Idi do' imam nicul ineh mangun ku baré luk tidulen pa kiung Tuhan. Ieh ineh aceh babpat luk meligan kuan imam, perapu dengan ruuk baré luk tidulen, tipan idi lip luk barén. Pangeh ineh lun luk pijani' ineh miak ngirup abpa' anggur.

²¹ “Idi ini ukum kuan lun Nasiri luk pejani'. Iamo' kudeng seburur pejani' maré meluun ratnan luk litep miak barén, do' ieh nganau' maya' kudeng luk pijani'neh ineh.”

Dalan Imam-Imam Ngeperuan Nelun Israil

²² Kebala Tuhan ni Musa,

²³ “Do' mada' kuan Arun idi anak-anakneh, Kudeng ini dalan muyuh ngeperuan nelun Israil: kebala muyuh,

²⁴ Do' Tuhan ngeperuan idi matar nemuyuh.

²⁵ Do' Tuhan méi' idi mekatu nemuyuh.

²⁶ Do' Tuhan mawa nemuyuh idi maré awang nemuyuh.

²⁷ “Kudeng ideh sembayang kudeng ini pa kiung Tuhan kuan lun Israil, idi Ui miak ngeperuan nedeh.”