IAP 4 - BALA LUK DO'

Kekamen Inul Kohat

¹ Kebala Tuhan ni Musa idi Arun,

² “Do' ngiap anak-anak deléi Kohat rat arang amung lun Liwi maya' inuldeh idi tetek ruma'deh,

³ rat ulun teluh ngepulu' lak macing limeh ngepulu' lak, idi luk miak ngakembang Lepo su luk inan papu' Tuhan.

⁴ Idi kekamendeh, ieh ineh nginita repapeh luk meluun ligan.

⁵ “Idi kareb amung pupu ineh nalan, do' Arun idi anak-anakneh pana' amé' bang Lepo ineh, idi ngerurut dicing ineh idi ngakeb Pati' Pejani' ku ineh.

⁶ Idi do' ideh ngerareng pa luun dicing ineh aceh ebpu ratnan kubil amék. Pangeh ineh do' ideh malad pa luunneh sepekatu kibung luk bata' melaco. Pangeh ineh do' nganau' kayuh luk ku mirir Pati' ineh.

⁷ “Idi do' ideh malad sepekatu kibung luk bata' melaco luun méja ruti luk barén kuan Tuhan idi ngerareng luun ineh amung bigan, kaduit, sikuan luk ku ngutang, idi busi', idi do' inan ruti luun méja ineh kidi-kidi.

⁸ Pangeh ineh do' malad sepekatu kibung mesia' pa luun amung ineh idi ngebpu kibung ineh ku kubil amék. Pangeh ineh do' nganau' kayuh luk ku mirir méja ineh.

⁹ “Idi do' ngakeb kukud dawan ineh dengan amung lapungneh, apitneh, amung luk ku ngilep, idi amung su luk inan umau lapung ineh ku sepekatu kibung luk mebata'.

¹⁰ Idi do' ngebpu kukud dawan ineh idi amung repapehneh ku ebpu ratnan kubil amék, idi do' nganau' kayuh luk ku mirir amung ineh.

¹¹ “Idi do' malad sepekatu kibung luk mebata' luun bubpun luk ratnan amas ineh, idi mapen ineh ku ebpu luk ratnan kubil amék. Idi do' nganau' kayuh luk ku mirir bubpun ineh.

¹² Pangeh ineh do' ngalap amung repapeh luk miak ruen bang kekamen Su luk Meligan ineh idi ngebpu ineh ku kibung luk mebata', idi mapen ineh ku ebpu luk ratnan kubil amék. Idi do' nganau' kayuh ineh ku mirir ineh.

¹³ Pangeh ineh do' nala' abuh luk luun bubpun ineh idi malad sepekatu kibung luk mesia' luunneh.

¹⁴ Idi do' ngerareng luunneh amung repapehneh luk miak ruen bang kekamen ineh, ieh ineh su luk inan amung bareh apui, serupang, luk ku ngook abuh, bigan, idi amung repapeh bubpun ineh. Idi mapen ineh ku ebpu luk ratnan kubil amék. Idi do' nganau' kayuh luk ku mirir ineh.

¹⁵ “Kareb amung pupu ineh nalan, do' Arun idi anak-anakneh mapen Su luk Meligan idi amung repapehneh, idi do' inul Kohat ineh amé' mirir ineh. Iamo' aleg ideh ngakem repapeh luk meligan ineh, pad ideh na maté. “Idi ini kekamen inul Kohat kareb Lepo su luk inan papu' Tuhan ruen mirir.

¹⁶ “Idi do' Eliasar anak Arun luk imam ineh, nginita umau lapung, umau luk do' buen, baré akan, idi umau luk ku ngumau, idi do' ideh nginita Lepo su luk inan papu' Tuhan dengan amung luk bang ineh luk linigan kuan Tuhan.”

^17-19 Kebala Tuhan ni Musa idi Arun, “Aleg nima' lun pupu Kohat ineh pitayen ngaceku amé' muneng ku repapeh luk meluun ligan. Do' Arun idi anak-anakneh nguit anid-anid burur lun Kohat su kekamendeh, idi su repapeh luk ruendeh mirir pad ideh na maté.

²⁰ Iamo' kudeng lun Kohat amé' nier kareb repapeh luk meligan ineh pipen, kali' rungen ideh maté.”

Kekamen Inul Gerson

²¹ Kebala Tuhan ni Musa,

²² “Do' iko ngiap anak-anak deléi Gerson maya' inuldeh, idi tetek ruma'deh,

²³ rat ulun teluh ngepulu' lak macing limeh ngepulu' lak, idi luk miak ngakem bang Lepo su luk inan papu' Tuhan.

²⁴ Idi ini luk miak ruen inul Gerson idi luk miak itendeh:

²⁵ dicing Lepo su luk inan papu' Tuhan, dueh ebpuneh, idi ebpu luk ratnan kubil amék luk ungen pa luun, idi dicing luk ku itek tanga',

²⁶ dicing natad dengan abetdeh idi dicing luk ku itek tanga' natad ineh, luk libut lepo ineh idi bubpun, dengan amung repapeh luk ku nganau' ineh. Idi ideh miak nganau' anun-anun luk petulu miak ruen ratnan amung-amung ineh.

²⁷ Amung kekamen anak-anak Gerson bang imet Arun idi anak-anakneh, ieh ineh ratnan amung luk itendeh, idi amung luk ruendeh. Do' Musa mada' amung luk miak itendeh.

²⁸ Idi ini kekamen anid tetek ruma' anak Gerson bang Lepo su luk inan papu' Tuhan. Idi Itamar anak Arun luk lun rayehdeh.

Kekamen Inul Merari

²⁹ “Idi do' Musa ngiap anak-anak deléi Merari maya' inuldeh idi tetek ruma'deh,

³⁰ rat ulun teluh ngepulu' lak macing limeh ngepulu' lak, idi amung luk miak ngakem bang Lepo su luk inan papu' Tuhan.

³¹ Ideh miak nguit amung bangar Lepo, atang, idi diri dengan alendeh,

³² idi amung diri dengan alenneh idi papekneh, abetneh, idi amung repapeh luk kuan Lepo ineh. Idi do' iko mada' ngadan repapeh luk miak itendeh.

³³ Idi ini kekamen inul Merari bang Lepo su luk inan papu' Tuhan. Idi Itamar Arun luk lun rayehdeh.”

Kinula' Lun Liwi

^34-48 Musa, Arun, idi amung lun rayeh lun Israil ineh nemaya' ecuk Tuhan idi nengiap amung anak deléi lun Kohat maya' inuldeh idi tetek ruma'deh, rat ulun teluh ngepulu' lak macing limeh ngepulu' lak, idi luk miak ngakem bang Lepo su luk inan papu' Tuhan. Idi ini kinula'deh: Kohat 2,750 Gerson 2,630 Merari 3,200 Kinula'deh: 8,580

⁴⁹ Idi anid-anid burur iniap maya' kekamenneh idi luk itenneh, mepad kudeng luk icuk Tuhan ni Musa.